ചെറുപുഴ: ചെറുപുഴയിലെ സ്വകാര്യ പണമിടപാടു സ്ഥാപനത്തിലെത്തി 24,000 രൂപ കവര്‍ന്ന കേസില്‍ ദക്ഷിണാഫ്രിക്കന്‍ സ്വദേശികള്‍ പിടിയില്‍.
ജ്വല്ലറി കവര്‍ച്ചക്കേസില്‍ കോഴിക്കോട് പന്നിയങ്കര പൊലിസ് കഴിഞ്ഞ ദിവസം പിടികൂടിയ ആഫ്രിക്കന്‍ വംശജര്‍ തന്നെയാണ് ചെറുപുഴയിലും തട്ടിപ്പു നടത്തിയതെന്ന് തിരിച്ചറിഞ്ഞതായി പൊലിസ് പറഞ്ഞു.
ദക്ഷിണാഫ്രിക്കയിലെ പ്രിട്ടോറിയയില്‍ നിന്നുള്ള ബൊറോമണ്ട് സാദിഖ് മുഹമ്മദ്, ഹോകന്‍ ഹുസൈന്‍ എന്നയാളുടെ ഭാര്യ ബാഗെരി മന്‍സാര്‍ എന്നിവരാണ് ജ്വല്ലറിയില്‍ നിന്നു പട്ടാപ്പകല്‍ സ്വര്‍ണം കവര്‍ന്നതിന് കോഴിക്കോട് പൊലിസിന്റെ പിടിയിലുള്ളത്. ജ്വല്ലറിയിലെ സി.സി.ടി.വി ദൃശ്യങ്ങളാണ് പ്രതികളെ കണ്ടെത്താന്‍ സഹായിച്ചത്.
ചെറുപുഴയില്‍ തട്ടിപ്പ് നടത്തിയവരുടെ ദൃശ്യങ്ങളും സമീപത്തെ സി.സി.ടി.വി കാമറയില്‍ പതിഞ്ഞിരുന്നു. ഈ ദൃശ്യങ്ങള്‍ കോഴിക്കോട് പൊലിസിന് കൈമാറിയാണ് പ്രതികള്‍ പിടിയിലായവര്‍ തന്നെയാണെന്ന് സ്ഥിരീകരിച്ചത്. അടുത്തിടെ മാനന്തവാടിയിലെ സ്വകാര്യ പണമിടപാട് സ്ഥാപനത്തിലെത്തി കറന്‍സി മാറ്റാനെന്ന പേരില്‍ യൂറോ തട്ടിയതും ഇതേ സംഘമാണെന്ന നിഗമനത്തിലാണ് പൊലിസ്.
ഇക്കഴിഞ്ഞ 15നാണ് ചെറുപുഴ തിരുമേനി റോഡില്‍ പ്രവര്‍ത്തിക്കുന്ന റോയല്‍ ഫൈനാന്‍സില്‍ നിന്ന് ആദായ നികുതി വകുപ്പിന്റെ പരിശോധനക്കെന്ന പേരിലെത്തിയ സ്ത്രീയും പുരുഷനും ചേര്‍ന്ന് ജീവനക്കാരെ തെറ്റിദ്ധരിപ്പിച്ച് പണം കവര്‍ന്നത്.
സ്ഥാപന ഉടമ ചെറുപുഴ പൊലിസ് സ്റ്റേഷനില്‍ നല്‍കിയ പരാതിയുടെ അടിസ്ഥാനത്തില്‍ എസ്.ഐ കെ.വി സ്മിതേഷിന്റെ നേതൃത്വത്തില്‍ പൊലിസ് അന്വേഷണം പുരോഗമിക്കുന്നതിനിടെയാണ് പ്രതികള്‍ കോഴിക്കോട്ട് പിടിയിലായത്. തെളിവെടുപ്പിനായി പ്രതികളെ അടുത്ത ദിവസം ചെറുപുഴയിലെത്തിക്കും.