തലശ്ശേരി: പകല്‍ സമയത്ത് വീട്ടിലെത്തി മതിലിലും ഗേറ്റിലും അടയാളമിട്ട ശേഷം രാത്രിയില്‍ മോഷണത്തിനെത്തുന്ന സംഘം തലശ്ശേരിയിലെത്തിയതായി സൂചന.
ഇതേത്തുടര്‍ന്ന് പൊലിസ് നിരീക്ഷണം ശക്തമാക്കി. കഴിഞ്ഞ ദിവസം തലശ്ശേരി ജില്ലാ കോടതിക്കു സമീപം ഒരു വീട്ടില്‍ ആക്രിസാധനങ്ങള്‍ എടുക്കുന്ന രണ്ടംഗ സംഘം എത്തി വീടിന്റെ ഭിത്തില്‍ അടയാളമിട്ടിരുന്നു.
വീട്ടമ്മ ഇതു ചോദ്യംചെയ്തപ്പോള്‍ സംഘം ഓടി രക്ഷപ്പെട്ടു. ചേറ്റംകുന്ന്, ചിറക്കര, സദാനന്ദപൈ റോഡ് എന്നിവിടങ്ങളിലെയും വീടുകളില്‍ ഇത്തരം അടയാളപ്പെടുത്തലുകള്‍ ശ്രദ്ധയില്‍പെട്ടിട്ടുണ്ട്. മതിലിലും വീടിന്റെ ഭിത്തിയിലും ഗേറ്റിലുമായി തലശ്ശേരി നഗരത്തിലെ അഞ്ചു വീടുകളിലാണ് ഇത്തരം അടയാളങ്ങളുള്ളത്. സ്ത്രീകള്‍ മാത്രമുള്ള വീടുകളെ ലക്ഷ്യമിട്ടാണ് ഇത്തരം സംഘം എത്തുന്നതെന്ന് പൊലിസ് പറഞ്ഞു. സംഭവത്തെ തുടര്‍ന്ന് നഗരത്തില്‍ പൊലിസ് പട്രോളിങ് ശക്തിപ്പെടുത്താന്‍ തീരുമാനിച്ചു.
സംശയകരമായി വീടുകളിലെത്തുന്നവരെക്കുറിച്ച് പൊലിസിന് വിവരം കൈമാറണമെന്ന് അറിയിച്ചു. ആക്രി സാധനങ്ങള്‍ ശേഖരിക്കുന്നവരെയും അപരിചിതരെയും വീട്ടുമതിലിനകത്ത് പ്രവേശിപ്പിക്കാതിരിക്കണമെന്നും ഭിക്ഷ യാചിക്കാന്‍ വീട്ടിലെത്തുന്നവരെ ശ്രദ്ധിക്കണമെന്നും പൊലിസ് മുന്നറിയിപ്പ് നല്‍കി.