കല്‍പ്പറ്റ: കെ.എസ്.ആര്‍.ടി.സി അന്യ സംസ്ഥാനങ്ങള്‍ക്ക് ടോള്‍ നല്‍കുന്നത് അവസാനിപ്പിക്കണമെന്ന് എന്‍.സി.പി വാര്‍ത്താസമ്മേളനത്തില്‍ ആവശ്യപ്പെട്ടു. നഷ്ടത്തില്‍ പ്രവര്‍ത്തിക്കുന്ന കെ.എസ്.ആര്‍.ടി.സിയെ ലാഭത്തില്‍ കൊണ്ടുവരാനുള്ള നടപടിയുടെ ഭാഗമായി അന്യസംസ്ഥാനങ്ങള്‍ക്ക് ടോള്‍ നല്‍കുന്നത് അവസാനിപ്പിക്കാന്‍ സംസ്ഥാന സര്‍ക്കാരിന്റെ ഭാഗത്ത് നിന്നും നടപടികള്‍ സ്വീകരിക്കണം. ഒരു ബസിന് 75 രൂപ നിരക്കിലാണ് കെ.എസ്.ആര്‍.ടി.സി അന്യസംസ്ഥാനങ്ങള്‍ക്ക് ടോള്‍ നല്‍കുന്നത്. ജില്ലയില്‍ മാത്രം 30 ഓളം ബസുകള്‍ ഇത്തരത്തില്‍ ടോള്‍ നല്‍കുന്നുണ്ട്. 810000 രൂപയാണ് ഈ ഇനത്തില്‍ അയല്‍ സംസ്ഥാനങ്ങള്‍ക്ക് നല്‍കിവരുന്നത്. മറ്റ് ജില്ലകളുടെ കണക്കുകള്‍ കൂടി പരിശോധിക്കുമ്പോള്‍ ലക്ഷക്കണക്കിന് രൂപ ടോള്‍ ഇനത്തില്‍ മറ്റ് സംസ്ഥാനങ്ങള്‍ക്ക് നല്‍കുന്നുണ്ട്. നഷ്ടത്തില്‍ പ്രവര്‍ത്തിക്കുന്ന സ്ഥാപനം എന്ന നിലക്ക് സംസ്ഥാന സര്‍ക്കാര്‍ അടിയന്തരമായി ഇടപെട്ട് ടോള്‍ സമ്പ്രദായം നിര്‍ത്തല്‍ ചെയ്യുകയോ ബദല്‍ സംവിധാനം ഏര്‍പ്പെടുത്താനുള്ള നടപടി സ്വീകരിച്ച് കെ.എസ്.ആര്‍.ടി.സിയെ സംരക്ഷിക്കണം.
ജില്ലയില്‍ വിവിധ രാഷ്ട്രീയപാര്‍ട്ടികളില്‍ നിന്ന് എന്‍.സി.പിയില്‍ ചേരുന്ന 100 ഓളം പ്രവര്‍ത്തകര്‍ക്ക് ഇന്ന് രാവിലെ 11ന് കല്‍പ്പറ്റയില്‍ വച്ച് ഗതാഗത മന്ത്രി എ.കെ ശശീന്ദ്രന്‍ അംഗത്വം നല്‍കും.
ജനുവരി ആദ്യവാരത്തില്‍ സുല്‍ത്താന്‍ ബത്തേരിയില്‍ വച്ച് നടക്കുന്ന കണ്‍വന്‍ഷന്‍ പാര്‍ട്ടി സംസ്ഥാന അധ്യക്ഷന്‍ ഉഴവൂര്‍ വിജയന്‍ ഉദ്ഘാടനം ചെയ്യും. വാര്‍ത്താസമ്മേളനത്തില്‍ സി.എം ശിവരാമന്‍, എം.പി അനില്‍, കെ.കെ രാജന്‍, കെ കുഞ്ഞിക്കണ്ണന്‍, എ.കെ രവി, കെ.സി ചെറിയാന്‍, കെ മുഹമ്മദലി, വന്ദന ഷാജു, പി അശോകന്‍, റഫീഖ് ബത്തേരി എന്നിവര്‍ പങ്കെടുത്തു.