കായംകുളം: മരണവീട്ടിലെത്തിയ ബന്ധുക്കളെ മുറിക്കുള്ളില്‍ പൂട്ടിയശേഷം യുവതികളുടെ കഴുത്തില്‍നിന്നും അഞ്ചര പവന്റെ മാല കവര്‍ന്നു. കഴിഞ്ഞ ഞായറാഴ്ച രാത്രി ചേരാവള്ളി പാണമ്പറമ്പില്‍ വീട്ടിലായിരുന്നു മോഷണം നടന്നത്. കഴിഞ്ഞദിവസം രവീന്ദ്രന്റെ ഭാര്യ സുജാത മരണപ്പെട്ടിരുന്നു.
മരണാനന്തര ചടങ്ങില്‍ പങ്കെടുക്കാനെത്തിയ സുജാതയുടെ സഹോദരിമാരായ ഗീതയുടെ രണ്ടര പവന്‍മാല, ഗിരിജയുടെ മൂന്നുപവന്‍ താലിമാല എന്നിവയാണ് മോഷ്ടാക്കള്‍ അപഹരിച്ചത്.     അടുക്കളവാതില്‍ തകര്‍ത്തായിരുന്നു മോഷണം. സംഭവസമയത്ത് വീട്ടിലുണ്ടായിരുന്ന ബന്ധുക്കളായ സുന്ദരന്‍, മുരളി എന്നിവരെ കിടപ്പുമുറിയില്‍ പൂട്ടിയിട്ട ശേഷം യുവതികളെ ആക്രമിച്ച് കഴുത്തില്‍ കിടന്ന മാല കവര്‍ന്ന് കടന്നുകളയുകയായിരുന്നു. ബഹളം കേട്ട് സമീപവാസികള്‍  എത്തിയെങ്കിലും മോഷ്ടാക്കളെ പിടികൂടാനായില്ല.
ഈ പ്രദേശത്ത് പല വീടുകളിലും മോഷണ ശ്രമം നടന്നതായി നാട്ടുകാര്‍ പറഞ്ഞു. രാത്രികാല പോലീസ് പട്രോളിംഗ് കുറഞ്ഞതാണ് മോഷ്ടാക്കള്‍ സജീവമാകാന്‍ കാരണമായത്.