ന്യൂഡല്‍ഹി: രാജ്യത്ത് നടപ്പാക്കിയ നോട്ട് നിരോധനത്തിലൂടെ ഏറ്റവും വലിയ അഴിമതിയാണ് പ്രധാനമന്ത്രി നരേന്ദ്രമോദി നടത്തിയതെന്ന് വെസ്റ്റ്ബംഗാള്‍ മുഖ്യമന്ത്രിയായ മമതാ ബാനര്‍ജി പറഞ്ഞു. നോട്ട് നിരോധനം നടപ്പാക്കി 50 ദിവസം പിന്നിട്ടിട്ടും രാജ്യത്ത് ഒരു മുന്നേറ്റവും സംഭവിച്ചിട്ടില്ല. എന്നാല്‍, മാറ്റം സംഭവിച്ചു. അത് രാജ്യത്തെ മുന്നോട്ടല്ല നയിച്ചത് പിന്നോട്ടാണെന്ന് മമത പറഞ്ഞു.

നോട്ട് നിരോധനം വഴി നടപ്പാക്കിയ അഴിമതിയാണ് അച്ഛാ ദിന്‍ എന്ന് മമത പറഞ്ഞു. ഇതു വഴി രാജ്യത്തെ കര്‍ഷകരെയാണ് മോദി കൊള്ളയടിച്ചിരിക്കുന്നത്. നോട്ട് നിരോധനം നടപ്പാക്കിയതിലൂടെ രാജ്യത്തെ 20 വര്‍ഷം പിന്നോട്ടാടിക്കുകയാണ് കേന്ദ്രസര്‍ക്കാര്‍ ചെയ്തിരിക്കുന്നതെന്നും മമത പറഞ്ഞു.

നോട്ട് നിരോധനത്തിലൂടെ രാജ്യത്തിന്റെ മൊത്തം സാമ്പത്തികാവസ്ഥയാണ് തകര്‍ന്നിരിക്കുന്നത്. 50 ദിവസത്തിനു ശേഷവും ഈയവസ്ഥയ്ക്ക മാറ്റം സംഭവിക്കില്ല. അതിനാല്‍ ഇതിന്റെ ഉത്തരവാദിത്തം ഏറ്റെടുത്ത് മോദി രാജിവയ്ക്കണമെന്നും മമത ആവശ്യപ്പെട്ടു.

നോട്ട് നിരോധനത്തിലൂടെ പ്രധാനമന്ത്രി നരേന്ദ്രമോദി കണ്ട ലക്ഷ്യം നേടാനായില്ലെന്ന് കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധി പറഞ്ഞു. ഇതു വഴി നോട്ട് നിരോധനം രാജ്യത്തെ ജനങ്ങള്‍ക്ക് കൂടുതല്‍ കഷ്ടതയും ദുരിതവും മാത്രമാണ് സമ്മാനിച്ചതെന്നും അദ്ദേഹം പറഞ്ഞു. നോട്ട് നിരോധനം തികച്ചും പരാജയപ്പെട്ടിരിക്കുന്ന അവസ്ഥയാണ് രാജ്യത്തിന്റെ നിലവിലെ അവസ്ഥയില്‍ നിന്നും മനസിലാക്കാവുന്നതാണെന്നും രാഹുല്‍ ഗാന്ധി പറഞ്ഞു.