മെല്‍ബണ്‍: ക്രിക്കറ്റ് ആസ്‌ത്രേലിയ തിരഞ്ഞെടുത്ത ഏകദിന ലോക ടീമിനെ ഇന്ത്യന്‍ ടെസ്റ്റ് നായകന്‍ വിരാട് കോഹ്‌ലി നയിക്കും. ആസ്‌ത്രേലിയന്‍ നായകന്‍ സ്റ്റീവന്‍ സ്മിത്തിനെ പിന്തള്ളിയാണ് കോഹ്‌ലിയെ നായകനായി ക്രിക്കറ്റ് ആസ്‌ത്രേലിയ തിരഞ്ഞെടുത്തത്. ടീമില്‍ ഇടം കണ്ട് ഇന്ത്യയുടെ യുവ ഫാസ്റ്റ് ബൗളര്‍ ജസ്പ്രിത് ബുമ്‌റയും ശ്രദ്ധേയ നേട്ടം സ്വന്തമാക്കി.
2016 കലണ്ടര്‍ വര്‍ഷത്തില്‍ 10 ഏകദിനങ്ങളില്‍ മാത്രമാണ് കോഹ്‌ലി കളിച്ചിട്ടുള്ളത്. പക്ഷേ 50 ഓവര്‍ മത്സരങ്ങളില്‍ കോഹ്‌ലിയുടെ മികവ് ലോകത്തെ ഏറ്റവും മികച്ചതാണെന്നു ക്രിക്കറ്റ് ആസ്‌ത്രേലിയയുടെ റിപ്പോര്‍ട്ടില്‍ പറയുന്നു. പത്തു ഏകദിനങ്ങളില്‍ നിന്നാണ് മൂന്നു സെഞ്ച്വറികളും നാലു അര്‍ധ ശതകങ്ങളുമടക്കം കോഹ്‌ലി 739 റണ്‍സാണ് അടിച്ചെടുത്തത്. റണ്‍സ് പിന്തുടര്‍ന്നുള്ള ഇന്ത്യയുടെ 59 മത്സരങ്ങളില്‍ കോഹ്‌ലിയാണ് മികച്ച സംഭാവന നല്‍കിയിട്ടുള്ള താരം. 20 സന്ദര്‍ഭങ്ങളില്‍ വിജയ റണ്‍സ് നേടിയ താരവും കോഹ്‌ലിയാണ്. 90.10 ശതമാനാണ് ആവറേജെന്നും റിപ്പോര്‍ട്ടിലുണ്ട്. ബുമ്‌റയും തിളങ്ങിയ വര്‍ഷമാണ് 2016. ഒന്‍പത് ഏകദിനങ്ങളില്‍ നിന്നായി 17 വിക്കറ്റുകളാണ് താരം സ്വന്തമാക്കിയത്. ഇതില്‍ ഒന്‍പതു വിക്കറ്റുകള്‍ സിംബാബ്‌വേക്കെതിരേയാണെന്നതു താരത്തിന്റെ കുറവായി കാണേണ്ടതില്ലെന്നു റിപ്പോര്‍ട്ടില്‍ പറയുന്നു.
ലോക ടീം: വിരാട് കോഹ്‌ലി (നായകന്‍), ഡേവിഡ് വാര്‍ണര്‍, ക്വിന്റന്‍ ഡി കോക്ക്, സ്റ്റീവന്‍ സ്മിത്ത്, ബാബര്‍ അസം, മിച്ചല്‍ മാര്‍ഷ്, ജോസ് ബട്‌ലര്‍, ജസ്പ്രിത് ബുമ്‌റ, ഇമ്രാന്‍ താഹിര്‍.