പള്ളുരുത്തി: 22ാമത് പള്ളുരുത്തി കാര്‍ണിവല്‍ ആഘോഷങ്ങള്‍ക്ക് ഇന്ന് തുടക്കമാകും. പള്ളുരുത്തി റിലീഫ് സെറ്റില്‍മെന്റ് അന്തേവാസികള്‍ക്കൊപ്പം ന്യു ഇയര്‍ ആഘോഷങ്ങളോടെ കാര്‍ണിവല്‍ ചടങ്ങുകള്‍ക്ക് തുടക്കമാകും. ഹൈബി ഈഡന്‍ എം.എല്‍.എ ചടങ്ങ് ഉദ്ഘാടനം ചെയ്യും. എന്‍.ആര്‍ ശ്രീകുമാര്‍ അധ്യക്ഷത വഹിക്കും. ഡിസംബര്‍ 30ന് ലഹരിക്കും മയക്കുമരുന്നിനുമെതിരെ 'റണ്‍ പള്ളുരുത്തി റണ്‍ ' കൂട്ടയോട്ടം നടക്കും. മേയര്‍ സൗമിനി ജെയിന്‍ ഫ്‌ളാഗ് ഓഫ് നടത്തും.
ജനുവരി ഒന്നിന് നടക്കുന്ന കാര്‍ണിവല്‍ റാലി പള്ളുരുത്തി കച്ചേരിപ്പടിയില്‍ നിന്നാരംഭിച്ച് വെങ്കിടാചലപതി ക്ഷേത്ര മൈതാനിയില്‍ സമാപിക്കും. തൃശൂര്‍ പൂരം പുലികളി, ഫ്‌ളോട്ടുകള്‍, കഥകളി, പ്രച്ഛന്നവേഷ മത്സരങ്ങള്‍, വിവിധ വാദ്യമേളങ്ങള്‍ കാര്‍ണിവല്‍ ആഘോഷങ്ങളില്‍ അണിനിരക്കുമെന്ന് സംഘാടകര്‍ അറിയിച്ചു. തുടര്‍ന്ന് നടക്കുന്ന സാംസ്‌ക്കാരിക സമ്മേളനം പ്രതിപക്ഷ നേതാവ് രമേശ് ചെന്നിത്തല ഉദ്ഘാടനം ചെയ്യുമെന്ന് സംഘാടക സമിതി ഭാരവാഹികളായ ബെയ്‌സില്‍ മൈലന്തറ, തമ്പി സുബ്രഹ്മണ്യം, കെ.ആര്‍.പ്രേമകുമാര്‍, എ.ജെ.ജെയിംസ്, ഷിജു ചിറ്റേപ്പള്ളി തുടങ്ങിയവര്‍ അറിയിച്ചു.