വടകര: അഴിയൂര്‍ ഗവ.ഹയര്‍സെക്കന്‍ഡറി സ്‌കൂള്‍ പ്ലസ്‌വണ്‍ വിദ്യാര്‍ഥിനി വള്ളിക്കാട് ബാലവാടിയിലെ അമൃത ആത്മഹത്യ ചെയ്ത സംഭവവുമായി ബന്ധപ്പെട്ട് അഴിയൂരിലെ മുന്നു യുവാക്കളെ ചോമ്പാല പൊലിസ് കസ്റ്റഡിയിലെടുത്തു. മരണത്തെ കുറിച്ച് അന്വേഷിക്കണമെന്നാവശ്യപ്പെട്ട് സ്‌കൂള്‍ പി.ടി.എ നല്‍കിയ പരാതിയെ തുടര്‍ന്നാണ് നടപടി. മരണവുമായി ബന്ധപ്പെട്ട് അഴിയൂര്‍ എരിക്കിന്‍ചാലിലെ ഇര്‍ഷാദിനെ (18 ) ലക്ഷ്യമിട്ടാണ് അന്വേഷണം പുരോഗമിക്കുന്നത്. ഇയാളുടെ സുഹൃത്തുക്കളെയാണ് കസ്റ്റഡിയിലെടുത്തത്. ഇവരെ ചോദ്യംചെയ്തുവരുന്നതായി പൊലിസ് അറിയിച്ചു.
അമൃതയെ ഇക്കഴിഞ്ഞ 24 നു രാത്രിയാണ് മുക്കാളി റെയില്‍വേ സ്റ്റേഷനടുത്ത് ട്രെയിന്‍ തട്ടി മരിച്ച നിലയില്‍ കണ്ടെത്തിയത്. സംഭവദിവസം അമൃതയും ഇര്‍ഷാദും റെയില്‍ പാളത്തിലൂടെ നടന്നു പോകുന്നത് കണ്ടതായി പറയുന്നു. കണ്ണൂക്കര വരെ ഇര്‍ഷാദ് ഒപ്പമുണ്ടായിരുന്നു. അമൃത പിന്നീട് പാളത്തിലൂടെ യാത്ര തുടര്‍ന്നു. ഇക്കാര്യം അന്വേഷണത്തില്‍ പൊലിസിനു ലഭിച്ചിട്ടുണ്ട്. തുടര്‍ന്നാണ് ഇര്‍ഷാദിന്റെ സുഹൃത്തുക്കളെ കസ്റ്റഡിയിലെടുത്തിരിക്കുന്നത്. ഇര്‍ഷാദ് ഒളിവില്‍ പോയിരിക്കുകയാണ്.അഴിയൂര്‍ ഹയര്‍ സെക്കന്‍ഡറി സ്‌കൂളിനു സമീപം സാമൂഹികവിരുദ്ധ സംഘം പ്രവൃത്തിക്കുന്നതായി പി.ടി.എ പൊലിസില്‍ പരാതിപ്പെട്ടു. പെണ്‍കുട്ടികളെ ബൈക്കിലെത്തി ശല്യം ചെയ്യുന്നവര്‍ക്കെതിരെ ശക്തമായ നടപടി വേണമെന്ന് പി.ടി.എ ആവശ്യപ്പെട്ടു.