സ്വിറ്റ്‌സര്‍ലന്റ്: മലേഷ്യക്ക് ദശലക്ഷം ഡോളറിന്റെ ഫണ്ട് നല്‍കിയത് സംബന്ധിച്ച അഴിമതിക്കേസില്‍ സ്വിസ് അധികൃതര്‍ ബി.എസ്.ഐ ബാങ്കിനെതിരേ നടപടി തുടങ്ങി. സ്വിസ് ഫിനാന്‍ഷ്യല്‍ റെഗുലേറ്റേഴ്‌സ് ആണ് ബി.എസ്.ഐ ബാങ്കിനെതിരേ ക്രിമിനല്‍ നടപടി ആരംഭിച്ചത്. ഇതിനിടെ ബാങ്കിന്റെ ചീഫ് എക്‌സിക്യൂട്ടീവ് സ്റ്റെഫാനോ കോദുരി രാജിവയ്ക്കുകയും ചെയ്തു. മലേഷ്യന്‍ അഴിമതിയുമായി ബന്ധപ്പെട്ടാണ് അന്വേഷണമെന്ന് സ്വിസ് അധികൃതര്‍ പറഞ്ഞു.
അതിനിടെ സിംഗപ്പൂരില്‍ സ്വിസ് ബാങ്ക് ശാഖ അടച്ചുപൂട്ടി. ഇതാദ്യമായാണ് ബാങ്ക് അടച്ചുപൂട്ടുന്നത്. 1984 ലാണ് ബാങ്ക് പ്രവര്‍ത്തനം തുടങ്ങിയത്. സിംഗപ്പൂര്‍ ഫിനാന്‍ഷ്യല്‍ റെഗുലേറ്റേഴ്‌സാണ് ബി.എസ്.ഐ ബാങ്കിനോട് അടച്ചുപൂട്ടാന്‍ നിര്‍ദേശിച്ചത്. വിദേശരാജ്യങ്ങളിലെ നേതാക്കളുടെ കള്ളപ്പണം വെളുപ്പിക്കുന്നതുമായി ബന്ധപ്പെട്ട കേസാണ് ബാങ്കിനെതിരേയുള്ളതെന്ന് സ്വിറ്റ്‌സര്‍ലന്‍ഡ് അറ്റോര്‍ണി ജനറലിന്റെ (ഒ.എ.ജി) ഓഫിസ് പറഞ്ഞു.
അതേസമയം അന്വേഷണവുമായി സഹകരിക്കുമെന്നും തുടര്‍നടപടികള്‍ ആലോചിക്കുമെന്നും ബി.എസ്.ഐ പ്രസ്താവനയില്‍ പറഞ്ഞു. മോണിറ്ററി അതോറിറ്റി ഓഫ് സിംഗപ്പൂര്‍ (എം.എ.എസ്) ബി.എസ്.ഐ ബാങ്കിനെതിരേ രംഗത്തുവന്നിട്ടുണ്ട്. ബാങ്കിന്റെ ഭരണം മോശമായിരുന്നുവെന്നും വ്യാപക തിരിമറികള്‍ ചില ജീവനക്കാര്‍ നടത്തിയിരുന്നുവെന്നും എം.എ.എസ് പറഞ്ഞു.