ആലപ്പുഴ : പുതുവര്‍ഷത്തെ വരവേല്‍ക്കാന്‍ ജില്ലാ ടൂറിസം പ്രമോഷന്‍ കൗണ്‍സിലും ജില്ലാ ഭരണകൂടവും ആലപ്പുഴ നഗരസഭയും ചേര്‍ന്ന് സംഘടിപ്പിക്കുന്ന ആലപ്പുഴ ബീച്ച് ടൂറിസം ഫെസ്റ്റിന്റെ ഭാഗമായുള്ള പുതുവത്സര സന്ദേശ സമ്മേളനം ഇന്ന് വൈകുന്നേരം 7.30ന് ബീച്ചില്‍ നടക്കും.
ഭക്ഷ്യ-സിവില്‍ സപ്ലൈസ് വകുപ്പുമന്ത്രി പി.തിലോത്തമന്‍ ആധ്യക്ഷ്യം വഹിക്കുന്ന ചടങ്ങില്‍ പൊതുമരാമത്ത് രജിസ്‌ട്രേഷന്‍ വകുപ്പുമന്ത്രി ജി.സുധാകരന്‍ ഉദ്ഘാടനം നിര്‍വഹിക്കും.കെ.സി.വേണുഗോപാല്‍ എം.പി.മുഖ്യപ്രഭാഷണം നടത്തും. ജില്ലാ പഞ്ചായത്ത് പ്രസിഡന്റ് ജി.വേണുഗോപാല്‍, മുനിസിപ്പല്‍ ചെയര്‍മാന്‍ തോമസ് ജോസഫ്, വൈസ് പ്രസിഡന്റ് ദലീമാജോജോ, സബ്കളക്ടര്‍ എസ്.ചന്ദ്രശേഖര്‍, നഗരസഭാ വൈസ് ചെയര്‍പേഴ്‌സണ്‍ ബീന കൊച്ചുബാവ, നഗരസഭാംഗം ഡി.ലക്ഷ്മണന്‍, ടൂറിസം ഡെപ്യൂട്ടി ഡയറക്ടര്‍ എസ്.ജയകുമാരി എന്നിവര്‍ സംസാരിക്കും. ഇന്നുവൈകുന്നേരം ആറുമണിമുതല്‍ ഹരിയാനയിലെ വിദ്യാര്‍ഥികള്‍ അവതരിപ്പിക്കുന്ന ഹര്യാന്‍വി ഫോക്ക് ഡാന്‍സ്, ഏഴിന് കുട്ടികളുടെ ഗാനമേള എന്നിവ ഉണ്ടാകും.
രാത്രി എട്ട് മണിമുതല്‍ ടെമ്പിള്‍ ഓഫ് ഇംഗ്ലീഷ് സ്‌കൂള്‍ അവതരിപ്പിക്കുന്ന ഡാന്‍സ് ഫെസ്റ്റ്, 8.45 മുതല്‍ പ്രത്യേക പരിപാടി സാന്താക്ലോസ്, രാത്രി ഒമ്പതുമണിക്ക് സുധീപ്കുമാറും സംഘവും അവതരിപ്പിക്കുന്ന ഗാന മേളയും മ്യൂസിക് ഫ്യൂഷനും എന്നിവ നടക്കും. രാത്രി 12 മുതല്‍ പുതുവത്സര വരവേല്‍പ്പും വെടിക്കെട്ടും നടക്കും.