കുന്നംകുളം: തെക്കേപ്പുറത്ത് പൂട്ടിയിട്ട വീട്ടില്‍ പട്ടാപകല്‍ മോഷണം നടന്ന സംഭവത്തില്‍ ഉന്നത പൊലിസ് മേധാവികള്‍ സ്ഥലത്ത് പരിശോധന നടത്തി. കഴിഞ്ഞ ദിവസം രാവിലെ പത്തോടെ തെക്കേപുറം പുലിക്കോട്ടില്‍ സനിലിന്റെ വീട്ടിലാണ് മോഷണം നടന്നത്. 11 പവന്‍ സ്വര്‍ണാഭരണങ്ങളും 24000 രൂപയുമാണ് മോഷണം പോയത്. ആള്‍ സഞ്ചാരമുള്ള സ്ഥലത്ത് പട്ടാപകല്‍ നടന്ന മോഷണം പൊലിസ് ഗൗരവത്തോടെയാണ് കാണുന്നത്.
കഴിഞ്ഞ ദിവസം തന്നെ തൃശൂരില്‍ നിന്ന് വിരലടയാള വിദഗ്ധരും ഡോഗ്‌സ്‌ക്വാഡും സ്ഥലത്തെത്തി പരിശോധന നടത്തിയിരുന്നു.
ഇത് സംബന്ധിച്ച് വിവരങ്ങള്‍ കൂടി ലഭ്യമായ ശേഷം മാത്രമേ മോഷണം സംബന്ധിച്ച കൂടുതല്‍ വിവരങ്ങള്‍ പൊലിസ് പുറത്ത് വിടൂ എന്നാണ് അറിയുന്നത്.
ജില്ലാ പൊലിസ് മേധാവി ആര്‍.നിശാന്തിനി ഐ.പി.എസ്, ഡിവൈ.എസ്.പി പി.വിശ്വംഭരന്‍, സി.ഐമാരായ രാജേഷ്.കെ.മേനോന്‍, സുരേഷ്‌കുമാര്‍ തുടങ്ങിയവര്‍ മോഷണം നടന്ന വീട്ടില്‍ പരിശോധന നടത്തി.
കുന്നംകുളം സി.ഐയാണ് കേസന്വേഷിക്കുന്നത്.