ഓയൂര്‍: രണ്ടു ദിവസം മുമ്പ് കാണാതായ പെണ്‍കുട്ടിയുടെ മൃതദേഹം ഇത്തിക്കരയാറ്റില്‍ കണ്ടെത്തിയ സംഭവത്തില്‍ ഏതാനുപേരെ പൊലിസ് കസ്റ്റഡിയിലെടുത്തു. മരണത്തിന് ഉത്തരവാദികളെ അറസ്റ്റ് ചെയ്യണമെന്നാവശ്യപ്പെട്ട് മൃതദേഹവുമായി ബന്ധുക്കളും നാട്ടുകാരും റോഡ് ഉപരോധിച്ചിരുന്നു.
കരിങ്ങന്നൂര്‍ അടയറ പ്രശാന്ത് മന്ദിരത്തില്‍ പ്രിയ (21)യുടെ മൃതദേഹവുമായി കഴിഞ്ഞദിവസം വൈകിട്ട് ആറിന് വെളിനല്ലുര്‍ പഞ്ചായത്ത് പ്രസിഡന്റ് എം.കെ നിര്‍മ്മലയുടെ നേതൃത്വത്തിലാണ് റോഡ് ഉപരോധിച്ചത്.
ഏഴാം കുറ്റി ജങ്ഷനിലെ ഉപരോധത്തെ തുടര്‍ന്ന് ആയൂര്‍ ഓയൂര്‍ റോഡില്‍ ഗതാഗതം സ്തംഭിച്ചിരുന്നു. കഴിഞ്ഞ ബുധനാഴ്ചയാണ് പ്രിയയെ വീട്ടില്‍നിന്നും കാണാതായത്. തുടര്‍ന്ന് വെള്ളിയാഴ്ച രാവിലെ ഒന്‍പതോടെ കരിങ്ങന്നൂര്‍ പുതുശേരി ഇത്തിക്കരയാറ്റിലെ വള്ളക്കടവിലാണ് മൃതദേഹം കണ്ടെത്തുകയായിരുന്നു. പ്രിയ കരിങ്ങന്നൂര്‍ പുതുശേരി സ്വദേശി അരുണ്‍ബാബുവുമായി പ്രണയത്തിലായിരുന്നു.
ഇരുവരുടേയും വീട്ടുകാര്‍ വിവാഹത്തെ സംബന്ധിച്ച് ചര്‍ച്ച ചെയ്യുകയും രജിസ്റ്റര്‍ വിവാഹം നടത്താന്‍ തീരുമാനിക്കുകയും ചെയ്തു. എന്നാല്‍ പിറ്റേദിവസം യുവാവിന്റെ സഹോദരിയും പിതാവും മറ്റു നാലുപേരുമായി പെണ്‍കുട്ടിയുടെ വീട്ടിലെത്തി വിവാഹം നടത്തണമെങ്കില്‍ സ്വര്‍ണവും പണവും നല്‍കണമന്ന് ആവശ്യപ്പെട്ടതോടെ അഭിപ്രായവ്യത്യാസം ഉണ്ടായതായി പറയുന്നു.
ബുധനാഴ്ച രാവിലെ അരുണ്‍ബാബുവിന്റെ പുതുശേരിയിലുള്ള വീട്ടിലെത്തിയ പ്രിയയെ പിന്നീട് കാണാതാവുകയുമായിരുന്നു.
പെണ്‍കുട്ടിയുടെ തിരോധാനവുമായി ബന്ധപ്പെട്ട് പൂയപ്പള്ളി പൊലിസില്‍ പരാതി നല്‍കിയിരുന്നു.
അന്വേഷണം നടക്കുന്നതിനിടെയാണ് പുതുശേരി വള്ളക്കടവില്‍ മൃതദേഹം കണ്ടെത്തിയത്. പെണ്‍കുട്ടിയുടെ മരണത്തില്‍ ദുരൂഹതയുണ്ടെന്ന് ബന്ധുക്കള്‍ ആരോപിക്കുകയും ആര്‍.ഡി.ഒയുടെ സാന്നിധ്യത്തില്‍ ഇന്‍ക്വിസ്റ്റ് തയാറാക്കണമെന്ന് ആവശ്യപ്പെടുകയും ചെയ്തു.
ആര്‍.ഡി.ഒയ്ക്ക് സ്ഥലത്തെത്താന്‍ അസൗകര്യം അറിയിച്ചതിനെ തുടര്‍ന്ന് കൊട്ടാരക്കര ഡി.വൈ.എസ്.പി, എഴുകോണ്‍, കൊട്ടാരക്കര സി.ഐമാര്‍ എന്നിവരുടെ നേതൃത്വത്തില്‍ ഫോറന്‍സിക് വിദഗ്ധര്‍ ഉള്‍പ്പെടെയുള്ള പൊലിസ് സംഘം സ്ഥലത്തെത്തിലയിരുന്നു. പരിശോധനയ്ക്ക് ശേഷം മൃതദേഹം തിരുവനന്തപുരം മെഡിക്കല്‍ കോളജ് ആശുപത്രിയില്‍ എത്തിച്ച് പോസ്റ്റ്‌മോര്‍ട്ടം നടത്തി. മരണത്തിനുത്തരവാദികളായ അരുണ്‍ബാബുവിനേയും, ഇദ്ദേഹത്തിന്റെ പിതാവ്, സഹോദരി എന്നിവരെ അറസ്റ്റ് ചെയ്യണമെന്നാവശ്യപ്പെട്ടാണ് പോസ്റ്റ്‌മോര്‍ട്ടം കഴിഞ്ഞ് എത്തിച്ച മൃതദേഹവുമായി റോഡ് ഉപരോധിച്ചത്.
സംഭവമറിഞ്ഞ് എഴുകോണ്‍ സി.ഐയുടെ നേതൃത്വത്തില്‍ പൊലിസ് സംഘം എത്തി രാഷ്ട്രീയ നേതാക്കളും നാട്ടുകാരുമായി ചര്‍ച്ച നടത്തിയതിന്റെ അടിസ്ഥാനത്തിലാണ് ഉപരോധം അവസാനിപ്പിച്ചത്.
വെള്ളിയാഴ്ച രാത്രി എട്ടിന് പ്രിയയുടെ മൃതദേഹം വീട്ടുവളപ്പില്‍ സംസ്‌കരിച്ചു. മാതാവ് ഷീല, സഹോദരന്‍ പ്രശാന്ത്