കല്‍പ്പറ്റ: ഒന്‍പതാം തരത്തിലെ വിദ്യാര്‍ഥികളുടെ പഠന പിന്നാക്കാവസ്ഥ പരിഹരിക്കുന്നതിനു കേന്ദ്രാവിഷ്‌കൃത പദ്ധതിയായ ആര്‍.എം.എസ്എ നടപ്പാക്കുന്ന 'നവപ്രഭ' സ്‌കൂള്‍തല പരിശീലനത്തിന്റെ ജില്ലാതല ഉദ്ഘാടനം അഞ്ചിനു നടക്കും. പനങ്കണ്ടി ഗവണ്‍മെന്റ് ഹയര്‍സെക്കന്‍ഡറി സ്‌കൂളില്‍ വൈകിട്ടു മൂന്നിന് ജില്ലാ പഞ്ചായത്ത് പ്രസിഡന്റ് ടി. ഉഷാകുമാരി ഉദ്ഘാടനം നിര്‍വഹിക്കും.
ഗണിതം, ശാസ്ത്രം, മലയാളം വിഷയങ്ങളില്‍ 45 മണിക്കൂര്‍ നീണ്ടുനില്‍ക്കുന്ന പരിശീലനത്തിന് ആവശ്യമായ കൈപ്പുസ്തകങ്ങള്‍ വിദ്യാലയങ്ങളില്‍ എത്തിച്ചിട്ടുണ്ട്. ഓരോ വിദ്യാലയത്തില്‍നിന്നു തിരഞ്ഞെടുത്ത എസ്.ആര്‍.ജി കണ്‍വീനറായ അധ്യാപകന് ആര്‍.എം.എസ്.എയുടെ നേതൃത്വത്തില്‍ പരിശീലനം കൊടുത്തതിനുശേഷമാണ് വിദ്യാലയങ്ങളില്‍ പദ്ധതിക്കു തുടക്കംകുറിക്കുന്നത്. പരിശീലനം നടത്തുന്നതിനു ജില്ലയിലെ മുഴുവന്‍ ഗവണ്‍മെന്റ് ഹൈസ്‌കൂളുകള്‍ക്കും ആര്‍.എം.എസ്.എ സാമ്പത്തിക സഹായം നല്‍കുമെന്ന് ജില്ലാ പ്രൊജക്ട് ഓഫിസര്‍ അറിയിച്ചു.