കാസര്‍കോട്: വില്‍പ്പനക്കായി കാറില്‍ കൊണ്ടുവന്ന മയക്കുമരുന്നുമായി രണ്ടംഗ സംഘം അറസ്റ്റില്‍. ഇന്നലെ രാവിലെ തളങ്കരയില്‍വച്ചാണ് മയക്കമരുന്നു വില്‍പ്പന സംഘത്തെ കാസര്‍കോട് സി.ഐ അബ്ദുള്‍ റഹീമും, എസ്.ഐ അജിത് കുമാറും ചേര്‍ന്ന് പിടികൂടിയത്. ബേക്കല്‍ ഇല്ല്യാസ് നഗറിലെ സമീര്‍ (40), കാഞ്ഞങ്ങാട് കൊളവയലിലെ അഹമ്മദ് അഫ്‌സല്‍ (23) എന്നിവരെയാണ് അറസ്റ്റ് ചെയ്തത്. ഇവരില്‍ നിന്നും 50 ഗ്രാം ചരസ് പിടികൂടി. പ്രതികള്‍ സഞ്ചരിച്ച ഇന്നോവ കാറും പൊലിസ് കസ്റ്റഡിയിലെടുത്തിട്ടുണ്ട്. ഇന്നു രാവിലെ തളങ്കരയില്‍ വാറന്റ് പ്രതിയെ പിടികൂടാനെത്തിയതായിരുന്നു പൊലിസ്. ഇന്നോവ കാറിനടുത്ത് സംശയകരമായി നിലയില്‍ രണ്ടുപേര്‍ നില്‍ക്കുന്നതുകണ്ടാണ് പൊലിസ് നീങ്ങിയത്. പൊലിസിനെ കണ്ടയുടന്‍ ഇവര്‍ രക്ഷപ്പെടാന്‍ ശ്രമിച്ചെങ്കിലും പിന്തുടര്‍ന്ന് പിടികൂടുകയായിരുന്നു. ഇവരെ ചോദ്യം ചെയ്തപ്പോഴാണ് മയക്കുമരുന്നുമായി വില്‍പ്പനക്കായി എത്തിയതാണെന്ന് വിവരം ലഭിച്ചത്.
തളങ്കരയില്‍ സ്ഥിരമായി ഈ ഇന്നോവ കാര്‍ എത്തുന്നതായി നേരത്തെ തന്നെ വിവരം ലഭിച്ചതിനാല്‍ കാര്‍ നിരീക്ഷണത്തിലുമായിരുന്നു. അന്താരാഷ്ട്ര മാര്‍ക്കറ്റില്‍ കിലോയ്ക്ക് പത്ത് ലക്ഷം രൂപ വില മതിക്കുന്ന മയക്കുമരുന്നാണ് പിടികൂടിയതെന്ന് പൊലിസ് പറഞ്ഞു.