ദോഹ: വഡോദരയിലെ ഗുജറാത്ത് പബ്ലിക് സ്‌കൂളില്‍ നടന്ന 21ാമത് സി.ബി.എസ.്ഇ നാഷനല്‍ അത്‌ലറ്റിക് മീറ്റില്‍ എംഇഎസ് ഇന്ത്യന്‍ സ്‌കൂള്‍ ചാംപ്യന്‍മാരായി. തുടര്‍ച്ചയായി രണ്ടാം തവണയാണ് എംഇഎസ് ചാംപ്യന്‍ പട്ടം നേടുന്നത്. ഡിസംബര്‍ 26 മുതല്‍ 31വരെ നടന്ന മീറ്റില്‍ 16 മെഡലുകളുമായി ബോയ്‌സ് വിഭാഗത്തിലും അണ്ടര്‍ 19 വിഭാഗത്തിലും എംഇഎസ് ഓവറോള്‍ ജേതാക്കളായി.
ഇന്ത്യയിലും ഗള്‍ഫ് രാജ്യങ്ങളിലുമായി നടന്ന ക്ലസ്റ്റര്‍ അത്‌ലിറ്റിക് മീറ്റുകളിലെ വിജയികളാണ് ഇന്ത്യയില്‍ നടന്ന ദേശീയ മീറ്റില്‍ മാറ്റുരച്ചത്. ഹമദ് ഇന്റര്‍നാഷനല്‍ എയര്‍പോര്‍ട്ടിലെത്തിയ ടീം അംഗങ്ങളെ സ്‌കൂള്‍ പ്രിന്‍സിപ്പാള്‍ ഡോ. എം എച്ച് ഖാന്റെ നേതൃത്വത്തിലുള്ള സംഘം സ്വീകരിച്ചു. വിജയികളായ വിദ്യാര്‍ഥികളെയും ഇവര്‍ക്ക് ആവശ്യമായ പരിശീലനം നല്‍കിയ കായിക അധ്യാപകരായ അക്ബര്‍ അലി, സ്റ്റീസണ്‍ കെ മാത്യു എന്നിവരെയും പ്രിന്‍സിപ്പാള്‍ അഭിനന്ദിച്ചു.