തലസ്ഥാന നഗരത്തില്‍ ഇനി നാലു ദിവസം കലയുടെ രാപകലുകള്‍. തിരുവനന്തപുരം റവന്യൂ ജില്ലാ കലോത്സവം പ്രധാനവേദിയായ കോട്ടണ്‍ഹില്‍ സ്‌കൂളില്‍ ഇന്നലെ രാവിലെ മന്ത്രി കടകംപള്ളി സുരേന്ദ്രന്‍ ഉദ്ഘാടനം ചെയ്തു. വിളംബരഘോഷയാത്രയോടെയാണ് കലോത്സവത്തിന് തുടക്കമായത്. വൈകീട്ട് മൂന്നുമണിക്ക് വെള്ളയമ്പലം മാനവീയം വീഥിയില്‍നിന്നാണ് കലോല്‍സവ ഘോഷയാത്ര ആരംഭിച്ചത്. തുടര്‍ന്നായിരുന്നു ഉദ്ഘാടന സമ്മേളനം . സമ്മേളനത്തിന് ശേഷം പ്രധാന വേദിയില്‍ തിരുവാതിര മത്സരം നടന്നു.
രാവിലെ 8.30ന് വിദ്യാഭ്യാസ ഡെപ്യൂട്ടി ഡയറക്ടര്‍ എംകെ ഷൈന്‍മോന്‍ കലോത്സവത്തിന് കൊടി ഉയര്‍ത്തി. രജിസ്‌ട്രേഷന് ശേഷം രചന മത്സരങ്ങള്‍ നടന്നു. ഉദ്ഘാടന ചടങ്ങില്‍ മേയര്‍ വി.കെ പ്രശാന്ത് അധ്യക്ഷനായി. ഒ. രാജഗോപാല്‍ എം.എല്‍.എ, ജില്ലാ പഞ്ചായത്ത് പ്രസിഡന്റ് വി.കെ മധു, ഡെപ്യൂട്ടി മേയര്‍ അഡ്വ.രാഖി രവികുമാര്‍, ജില്ലാ പഞ്ചായത്ത് വൈസ് പ്രസിഡന്റ് അഡ്വ.ശൈലജാ ബീഗം, നഗരസഭ സ്റ്റാന്റിങ് കമ്മിറ്റി ചെയര്‍മാരായ എസ്. ഉണ്ണികൃഷ്ണന്‍, വഞ്ചിയൂര്‍ പി ബാബു, ആര്‍. ഗീത ഗോപാല്‍, കെ ശ്രീകുമാര്‍, എസ് ശഫീറാ ബീഗം, കൗണ്‍സിലര്‍മാരായ പാളയം രാജന്‍, വിദ്യാ മോഹന്‍, പാപ്പനംകോട് സജി, ഡി.ഡി.ഇ എം.കെ ഷൈന്‍മോന്‍, ഉദ്യോഗസ്ഥ പ്രമുഖര്‍ എന്നിവര്‍ പങ്കെടുത്തു.
12 ഉപജില്ലകളില്‍ നിന്നായി ഏകദേശം അയ്യായിരത്തോളം വിദ്യാര്‍ഥികള്‍ മാറ്റുരക്കാനെത്തുന്നുണ്ട്. കോട്ടണ്‍ഹില്‍ ഗേള്‍സ് ഹയര്‍ സെക്കന്‍ഡറി സ്‌കൂള്‍, കാര്‍മല്‍ ഗേള്‍സ് ഹയര്‍ സെക്കന്‍ഡറി സ്‌കൂള്‍, ശിശുവിഹാര്‍, കോട്ടണ്‍ഹില്‍ ഗേള്‍സ് എല്‍പിഎസ്, പിപിടിടിഐ കോട്ടണ്‍ഹില്‍ എന്നിവിടങ്ങളിലെ 14 വേദികളിലാണ് മത്സരങ്ങള്‍ അരങ്ങേറുന്നത്. ഏഴിനാണ് സമാപനം.
കൊല്ലം
നാദബ്രഹ്മത്തിന്റെ താളലയങ്ങളും നൃത്തവിസ്മയവുമൊരുക്കി കൊല്ലം റവന്യൂ ജില്ലാ സ്‌കൂള്‍ കലോത്സവത്തിന്റെ കലാമത്സരങ്ങള്‍ക്ക് ഇന്നലെ തുടക്കമായി. ഇനിയുള്ള മൂന്ന് ദിനങ്ങള്‍ കലയുടെ ഭാവരാഗതാള ലയങ്ങളാല്‍ നാട് മുഖരിതമാകും. ഭാവിയിലെ ഗാനഗന്ധര്‍വാരും അഭിനയപ്രതിഭകളും അരങ്ങ് കൊഴുപ്പിക്കുമ്പോള്‍ വിസ്മയത്തിന്റെ രാപ്പകലുകളാണ് ഇനി അഞ്ചലിന്.
രാവിലെ ഒമ്പതിന് നാടിന് നയനവിസ്മയമൊരുക്കി ഘോഷയാത്ര നടന്നു. വിവിധ സ്‌കൂളിലെ കുട്ടികള്‍ വിവിധ വര്‍ണ്ണത്തിലുള്ള വേഷം ധരിച്ച് അണിചേര്‍ന്നു. പരിസ്ഥിതിസംരക്ഷണത്തിറന്റെ ആവശ്യകത വ്യക്തമാക്കുന്ന മുദ്രവാക്യങ്ങളുള്ള പ്ലക്കാര്‍ഡുമായാണ് കുട്ടികള്‍ പങ്കെടുത്തത്. കൂടാതെ ബാന്റ്, വാദ്യമേളങ്ങള്‍ എന്നിവ മിഴിവേകി. ഘോഷയാത്രക്ക് ശേഷം പ്രധാനവേദിയില്‍ നടന്ന കലോത്സവത്തിന്റെ ഉദ്ഘാടനം എന്‍.കെ പ്രേമചന്ദ്രന്‍ എം.പി നിര്‍വഹിച്ചു. ജില്ലാ പഞ്ചായത്ത് പ്രസിഡന്റ് കെ.ജഗദമ്മ അധ്യക്ഷയായി. ഡി.ഡി.ഇ കെ.എസ് ശ്രീകല, ജനപ്രതിനിധികളായ രഞ്ജു സുരേഷ്, സുജാ ചന്ദ്രബാബു, നന്ദകുമാര്‍, അജിത്കുമാര്‍, മണികുട്ടന്‍ എന്നിവര്‍ സംസാരിച്ചു. തുടര്‍ന്ന് മത്സരങ്ങള്‍ ആരംഭിച്ചു. ഈസ്റ്റ് ഗവ. എച്ച്എസ്എസാണ് പ്രധാനവേദി.
പത്ത് വേദികളിലായാണ് മത്സരങ്ങള്‍ നടക്കുന്നത്. വേദി ഒന്നില്‍ ഇന്നലെ ഹൈസ്‌കൂള്‍, ഹയര്‍സെക്കണ്ടറി വിഭാഗങ്ങളുടെ ഭരതനാട്യമത്സരം നടന്നു. വേദി രണ്ടില്‍ അറബിക് പ്രസംഗം നടന്നു. ബി.വി.യു.പി.എസിലെ വേദി മൂന്നില്‍ യു.പി, ഹയര്‍സെക്കണ്ടറി വിഭാഗം വിദ്യാര്‍ഥികളുടെ നാടക മത്സരം നടന്നു.
വേദി നാലായ ഗവ.എച്ച്എസ്.എസ് വെസ്റ്റില്‍ യു.പി വിഭാഗം ഭരതനാട്യം, കുച്ചുപ്പുടി, ഹൈസ്‌കൂള്‍,യു.പി വിഭാഗം മോഹിനിയാട്ട മത്സരം എന്നിവ നടന്നു. വേദി അഞ്ചില്‍ അറബിക് കലോത്സവവും വേദി എഴില്‍ സംസ്‌കൃത കലോത്സവവും നടന്നു. വേദി ആറില്‍ ബി.എഡ് ഹാളില്‍ യു.പി, ഹെസ്‌കൂള്‍, ഹയര്‍സെക്കണ്ടറി വിഭാഗം വിദ്യാര്‍ഥികളുടെ ശാസ്ത്രീയ സംഗീത മത്സരങ്ങളായിരുന്നു. വേദി എട്ടില്‍ തിരുവാതിരക്കളിയും ഒമ്പതില്‍ ചവിട്ടുനാടകം, മാര്‍ഗംകളി, പരിചമുട്ട് എന്നിവയും വേദി പത്തില്‍ മോണോ ആക്ട്, മിമിക്രി എന്നീ മല്‍സരങ്ങളും നടന്നു