ഇരിട്ടി: ഇരിട്ടി പഴയ ബസ് സ്റ്റാന്‍ഡില്‍ ജ്വല്ലറിയില്‍ മോഷണ ശ്രമം. താളുകണ്ടത്തില്‍ പ്രിയ ജ്വല്ലറിയുടെ പുറകു വശത്തെ ചെങ്കല്‍ ചുമര്‍ തുരന്നാണ് കവര്‍ച്ചയ്ക്ക് ശ്രമം നടത്തിയത്. ഒരാള്‍ക്ക് കടക്കാന്‍ പാകത്തില്‍ വലിയ ദ്വാരമുണ്ടാക്കിയ നിലയിലാണ്. ചുമരിനോടു ചേര്‍ന്ന് ഇരുമ്പ് പാളികള്‍ കൊണ്ടുള്ള കവചമുള്ളതിനാല്‍ മോഷ്ടാക്കള്‍ക്ക് അകത്ത് പ്രവേശിക്കാന്‍ സാധിച്ചില്ല. ഇന്നലെ കട തുറക്കാനെത്തിയ ജീവനക്കാരാണ് മോഷണ ശ്രമം ആദ്യം കണ്ടെത്തുന്നത്. ഞായറാഴ്ച കട അവധിയായതിനാല്‍ മോഷണ ശ്രമം ശനിയാഴ്ച രാത്രിയാകാനാണ് സാധ്യത എന്നു കരുതുന്നു. ആഭരങ്ങള്‍ സൂക്ഷിച്ച ലോക്കര്‍ റൂമിനോട് ചേര്‍ന്ന മുറിയുടെ ചുമരാണ് തുരന്നത്. ഇരുമ്പ് പാര പോലുള്ള ആയുധം കൊണ്ടായിരിക്കാം തുരന്നതെന്നാണ് പൊലിസ് നിഗമനം. ജ്വല്ലറി ഉടമയുടെ പരാതിയില്‍ ഇരിട്ടി ഡിവൈ.എസ്.പി പ്രജീഷ് തോട്ടത്തില്‍, എസ്.ഐ സുധീര്‍ കല്ലന്‍ എന്നിവര്‍ സ്ഥലത്തെത്തി പ്രാഥമിക അന്വേഷണം നടത്തി. നഗരത്തിലെ സുരക്ഷാ കാമറ ദൃശ്യങ്ങളും പരിശോധിച്ച് വരികയാണ്.