ദോഹ. ഖത്തര്‍.കെ.എം.സി.സി വിദ്യാര്‍ഥികള്‍ക്കിടയില്‍  പ്രവര്‍ത്തന രംഗം വ്യാപകമാക്കുന്നതിന്റെ  ഭാഗമായി ഗ്രീന്‍ ടീന്‍സ് എന്ന പേരില്‍ വിദ്യാര്‍ഥി വിംഗ് രൂപീകരിക്കുന്നു.

ജനുവരി 20 ന് ഉച്ചക്ക് ഒരു മണിക്ക് ഹിലാലിലുള്ള കെ.എം.സി.സി ഹാളില്‍ ചേരുന്ന  പ്രഖ്യാപന സമ്മേളനത്തോടെ ഗ്രീന്‍ ടീന്‍സ് വിദ്യാര്‍ത്ഥി വിങ് പ്രവര്‍ത്തന രംഗത്ത് സജീവമാവും.  

അക്കാദമികവും പാഠ്യേതരവുമായ  മേഖലകളില്‍ കുട്ടികള്‍ക്ക് വേണ്ട മാര്‍ഗദര്‍ശനം നല്‍കാനും പുതിയ കാലത്തെ വെല്ലുവിളികള്‍ ഏറ്റെടുക്കാന്‍ അവരെ സജ്ജരാക്കുകയുമാണ് ഗ്രീന്‍ ടീന്‍സിന്റെ പ്രവര്‍ത്തന ലക്ഷ്യം. സംഘബോധത്തിന്റെ പ്രാധാന്യം അരക്കിട്ടുറപ്പിക്കാനും അതുവഴി സാമൂഹിക സാംസ്‌കാരിക ധാര്‍മിക അക്കാദമിക മേഖലകളില്‍ പുതിയ നേട്ടങ്ങള്‍ക്കായി ശക്തമായി പ്രവര്‍ത്തിക്കാനും ഗ്രീന്‍ ടീന്‍സ് മുന്നിലുണ്ടാവുമെന്ന് ഖത്തര്‍ കെ എം സി സി സ്റ്റുഡന്റസ് സര്‍ക്കിള്‍ ഭാരവാഹികള്‍ അറിയിച്ചു.

ഇരുപതിന് നടക്കുന്ന പ്രഖ്യാപന സമ്മേളനത്തില്‍ എം.എസ്.എഫ് ദേശീയ പ്രസിഡണ്ട് ടി പി അഷ്‌റഫലി മുഖ്യാതിഥിയായി പങ്കെടുക്കും.   ഗ്രീന്‍ ടീന്‍സിനെക്കുറിച്ചും  പരിപാടിയെക്കുറിച്ചും കൂടുതല്‍ അറിയാന്‍ 66009515 , 33667414  എന്നീ നമ്പറുകളില്‍ ബന്ധപ്പെടാവുന്നതാണ്.