ന്യൂയോര്‍ക്ക്: അമേരിക്കന്‍ പ്രസിഡന്റ് പദവിയില്‍നിന്ന് ഒഴിയുന്ന ബരാക് ഒബാമക്ക് ജോലി വാഗ്ദാനവുമായി സ്‌പോട്ടിഫൈ എന്ന പരസ്യസ്ഥാപനം രംഗത്ത്. സംഗീത പരസ്യ സ്ഥാപനമാണ് സ്‌പോട്ടിഫൈ. പ്രസിഡന്റ് ഓഫ് പ്ലേ ലിസ്റ്റ് എന്ന പേരിലാണ് ജോലി.
കലാകാരന്‍മാരുമായും സംഗീതജ്ഞരുമായുമുള്ള ബന്ധമാണ് ഈ ജോലിക്ക് ഒബാമയെ ക്ഷണിക്കാന്‍ കാരണമെന്ന് കമ്പനി അറിയിച്ചു. വാര്‍ത്താസമ്മേളനങ്ങളില്‍ പ്ലേ ലിസ്റ്റിനെക്കുറിച്ച് വികാരതീവ്രമായി സംസാരിക്കാനാവുമെന്നതാണ് അദ്ദേഹത്തിന്റെ മറ്റൊരു ഗുണമേന്മയായി കമ്പനി പറയുന്നത്. എല്ലാക്കാലത്തെയും മഹാനായ പ്രാസംഗികന്‍ ഒബാമയാണെന്നും അതാണ് തങ്ങള്‍ക്കാവശ്യമെന്നും കമ്പനി പറയുന്നു. സ്‌പോട്ടിഫൈ സി.ഇ.ഒ ഡാനിയല്‍ ഇ.കെ ട്വിറ്ററിലൂടെയാണ് ഇക്കാര്യം അറിയിച്ചത്.
കഴിഞ്ഞ ദിവസം സ്വീഡനില്‍ വച്ച് സിംപോസിയം സ്റ്റോക്ക്‌ഹോമിന്റെ സി.ഇ.ഒ യോട് സംസാരിക്കവെ സ്‌പോട്ടിഫൈയിലെ ജോലിക്കായി താന്‍ കാത്തിരിക്കുകയാണെന്ന് ഒബാമ പറഞ്ഞിരുന്നു.