തളിപ്പറമ്പ്: ബി.ജെ.പി പ്രവര്‍ത്തകന്റെ വീടിനു നേരെ ആക്രമണം. കണ്ണപ്പിലാവിലെ ടിപ്പര്‍ ലോറി ഡ്രൈവര്‍ തൈവളപ്പില്‍ സതീശന്റെ വീടിനു നേരെയായിരുന്നു ഇന്നലെ പുലര്‍ച്ചെ 12.45ഓടെ ആക്രമണമുണ്ടായത്. വീട്ടുമുറ്റത്ത് നിര്‍ത്തിയിട്ട ടിപ്പര്‍ ലോറിയുടെ ചില്ലും വീടിന്റെ ജനല്‍ ചില്ലുകളും എറിഞ്ഞു തകര്‍ത്തു.
ശബ്ദം കേട്ട് വീട്ടുകാര്‍ പുറത്തു വരുമ്പോഴേക്കും സതീശന്‍ കിടക്കുന്ന മുറിയുടെ ജനല്‍ ചില്ലുകള്‍ തകര്‍ക്കുകയും ടിപ്പര്‍ ലോറിയുടെ മുന്നിലെ ചില്ല് ഓട് കൊണ്ടെറിഞ്ഞ് തകര്‍ക്കുകയും ചെയ്തിരുന്നു. അക്രമികള്‍ വീടിനു പിറകുവശത്തേക്ക് ഓടി രക്ഷപ്പെട്ടു. സംഭവ സമയം വീട്ടില്‍ അച്ഛന്‍ ഗോവിന്ദനും അമ്മ വസന്തയും ഉണ്ടായിരുന്നു. തളിപ്പറമ്പ് പൊലിസ് ഉടന്‍ സ്ഥലത്തെത്തിയെങ്കിലും ആരെയും കണ്ടെത്താനായില്ല. സതീശന്റെ പരാതിയില്‍ പൊലിസ് അന്വേഷണം നടത്തിവരികയാണ്. പിന്നില്‍ സി.പി.എം പ്രവര്‍ത്തകരാണെന്ന് ബി.ജെ.പി ആരോപിച്ചു.