ചെന്നൈ: ജെല്ലിക്കെട്ട് നിരോധനത്തിനെതിരേ ഡി.എം.കെയും നേതൃത്വത്തില്‍ തമിഴ്‌നാട്ടില്‍ പ്രതിഷേധം. ചെന്നൈ കലക്റ്ററേറ്റ് ഓഫിസിനു മുന്‍പില്‍ നടന്ന പ്രതിഷേധ റാലിക്ക് ഡി.എം.കെ അധ്യക്ഷന്‍ സ്റ്റാലിന്‍ നേതൃത്വം നല്‍കി.

ജെല്ലിക്കെട്ട് നമ്മുടെ സംസ്‌കാരത്തിന്റെ ഭാഗമാണ്. എന്നാല്‍ കേന്ദ്ര,സംസ്ഥാന സര്‍ക്കാരുകള്‍ ഇത് നടത്താനുള്ള അനുമതി നല്‍കുന്നില്ല. ഇക്കാര്യത്തില്‍ അവര്‍ സമ്പൂര്‍ണ പരാജയമാണെന്നും അദ്ദേഹം പറഞ്ഞു. കേന്ദ്ര സര്‍ക്കാര്‍ അടിയന്തരമായി ഇക്കാര്യത്തില്‍ ഓര്‍ഡിനന്‍സ് പുറപ്പെടുവിക്കണം. സംസ്ഥാന സര്‍ക്കാര്‍ ഇത് സംരക്ഷിക്കാനുള്ള നടപടിയെടുക്കണമെന്നും സ്റ്റാലിന്‍ ആവശ്യപ്പെട്ടു.

മുന്‍ കേന്ദ്രമന്ത്രിയും ഡി.എം.കെ നേതാവുമായ കനിമൊഴിയടക്കം നിരവധി പ്രവര്‍ത്തകരാണ് റാലിയില്‍ പങ്കെടുത്തത്. പ്രവര്‍ത്തകര്‍ കാലികളുമായി എത്തിയാണ് പ്രതിഷേധിച്ചത്. ജെല്ലിക്കെട്ട് നിരോധിച്ചുകൊണ്ടുള്ള കേന്ദ്ര സര്‍ക്കാര്‍ ഉത്തരവിന് എതിരായ ഹരജികള്‍ തീര്‍പ്പാക്കണമെന്നാവശ്യപ്പെട്ടുള്ള തമിഴ്‌നാട് സര്‍ക്കാരിന്റെ ഹരജി കഴിഞ്ഞ ദിവസം സുപ്രിം കോടതി തള്ളിയിരുന്നു.