കൊച്ചി:അനാഥാലയങ്ങളിലും അഗതിമന്ദിരങ്ങളിലും അന്തേവാസികളെ പീഡിപ്പിക്കുന്ന സംഭവങ്ങളില്‍ കര്‍ശന നടപടി സ്വീകരിക്കുമെന്ന് ആരോഗ്യ മന്ത്രി കെ.കെ ഷൈലജ. നല്ല രീതിയില്‍ പ്രവര്‍ത്തിക്കുന്ന ബഹഭൂരിപക്ഷം അനാഥാലയങ്ങള്‍ക്കും ദുഷ്‌പേരുണ്ടാക്കുന്ന ഇത്തരക്കാരെ വെറുതെ വിടില്ലെന്നും മന്ത്രി വ്യക്തമാക്കി.
സാമൂഹികനീതി വകുപ്പ്, ഓര്‍ഫനേജ് കണ്‍ട്രോള്‍ ബോര്‍ഡ് എന്നിവയുടെ ആഭിമുഖ്യത്തില്‍ എടത്തലയില്‍ അനാഥാലയങ്ങളുടെയും ധര്‍മസ്ഥാപനങ്ങളുടെയും സംസ്ഥാനതല കുടുംബസംഗമ സമ്മേളനം ഉദ്ഘാടനം ചെയ്യുകയായിരുന്നു മന്ത്രി. ജീവിതത്തില്‍ ഒറ്റപ്പെട്ടുപോകുന്നവരെ സംരക്ഷിക്കുകയെന്ന സാമൂഹികധര്‍മമാണ് അനാഥാലയങ്ങളും അഗതിമന്ദിരങ്ങളും നിറവേറ്റുന്നത്.
സമൂഹത്തിന്റെ വികസനം സന്തുലിതമല്ലാത്തതിനാലും ഭരണഘടന വിഭാവനം ചെയ്ത ലക്ഷ്യങ്ങള്‍ പൂര്‍ത്തിയാകാത്തതിനാലുമാണ് അനാഥരും അഗതികളുമുണ്ടാകുന്നത്.
1957മുതല്‍ കേരളത്തില്‍ നിലവില്‍ വന്ന സര്‍ക്കാരുകള്‍ നടപ്പാക്കിയ പരിഷ്‌കരണ നടപടികളുടെ തുടര്‍ച്ചയില്‍ ഈ രംഗത്തും അനുകൂലമായ മാറ്റങ്ങളുണ്ടായി. ഭൂപരിഷ്‌കരണം, ആരോഗ്യക്ഷേമം, വിദ്യാഭ്യാസം തുടങ്ങിയ മേഖലകളിലെ പരിഷ്‌കരണ നടപടികളാണ് കടുത്ത ദാരിദ്ര്യത്തില്‍ നിന്നും കേരളത്തെ മോചിപ്പിച്ചതെന്നും മന്ത്രി ചൂണ്ടിക്കാട്ടി.
അന്‍വര്‍ സാദത്ത് എം.എല്‍.എ അധ്യക്ഷത വഹിച്ചു.
ജില്ലാ കലക്ടര്‍ മുഹമ്മദ് വൈ സഫറുല്ല, എടത്തല ഗ്രാമപഞ്ചായത്ത് പ്രസിഡന്റ് സാജിത അബ്ബാസ് പ്രസംഗിച്ചു.