മലയിന്‍കീഴ്:  തലസ്ഥാന ജില്ലയിലെ മലയിന്‍കീഴ് മൂക്കുന്നിമല മുതല്‍ മലയോരങ്ങളില്‍ വ്യാപിച്ചു കിടക്കുന്ന പാറമേഖലകളില്‍ ആധിപത്യം ഉറപ്പിച്ച പാറലോബികളും ഖനന യൂനിറ്റുകളും അനുമതി ഇല്ലാതെ പാറപാളികള്‍ ( ഗ്രാനൈറ്റ് പാളികള്‍) വന്‍ തോതില്‍ കടത്തുന്നു. അതിര്‍ത്തി ചെക്ക് പോസ്റ്റുകളില്‍ ഒരു പരിശോധനയും കൂടാതെ തമിഴ്‌നാട്ടിലെ തൂത്തുക്കുടി തുറമുഖത്താണ് എത്തിക്കുന്നത്. അവിടെ നിന്നും കണ്ടെയനറുകളില്‍ കയറ്റി യു.എസ് അടക്കമുള്ള വിദേശരാജ്യങ്ങളില്‍ എത്തിക്കുന്നു. കിട്ടുന്നത് കോടികള്‍.      
ഇത്തരം പാളികളെ ക്യഷ്ണശില എന്നാണ് വിളിക്കുന്നത്. പ്രത്യേക തരത്തില്‍ രൂപപ്പെട്ട പാറകളില്‍ നിന്നാണ്  പാളികള്‍ കിട്ടുന്നത്. തിരുവനന്തപുരം, കൊല്ലം, പത്തനംതിട്ട, കോട്ടയം തുടങ്ങി മിക്ക മേഖലകളിലും ഇത്തരം പാളികള്‍ ലഭിക്കുന്നുണ്ട്.
അത് അവിടുള്ള പാറ ഖനനക്കാരെ കണ്ട് നിസ്സാര തുകയ്ക്ക് വാങ്ങി അത് പാളികളാക്കും. അതിനായി  തിരവനന്തപുരത്തെ പെരുങ്കടവിളയിലും നഗരൂലിലും ചില യൂനിറ്റുകളുണ്ട്. അവിടെ എത്തിച്ച് പാളികളാക്കി ലോറികളില്‍ പാറ എന്ന ലേബലില്‍ ചെക്ക് പോസ്റ്റ് കടത്തും. തുടര്‍ന്ന് അത് മിനുസപ്പെടുത്താന്‍ തമിഴ് നാട്ടിലെ രഹസ്യ കേന്ദ്രങ്ങളിലെത്തിക്കും. അവിടെ നിന്നും പരുവപ്പെടുത്തി തൂത്തുക്കുടി തുറമുഖത്തു നിന്നും കണ്ടെയനറുകളിലാക്കി കടല്‍ കടത്തും. ഇതു വഴി കോടികളാണ് ഇവര്‍ കൊയ്യുന്നത്.
പാറ പൊട്ടിക്കാനാണ് സര്‍ക്കാര്‍ ലൈസന്‍സ് നല്‍കിയിട്ടുള്ളത്. എന്നാല്‍ അതിന്റെ മറവില്‍ പാളികള്‍ ആക്കുന്നതാണ് ഇവിടെ നടക്കുന്നത്. പാളികള്‍ ആക്കാന്‍ പലരും പാറ ഖനനത്തിനൊപ്പം ക്രഷര്‍ യൂനിറ്റുകളും തുടങ്ങിയിട്ടുണ്ട്. അതിനാല്‍ തന്നെ ഇവിടെ എന്തു നടക്കുന്നുവെന്ന് പുറംലോകം അറിയാറില്ല. പാറ ഖനനം നടക്കുന്നു എന്ന ലേബലിലാണ് പാളികള്‍ കടല്‍ കടക്കുന്നത്. പൊലിസിനും പാറകല്ലുകള്‍ എന്നതാണ് അറിയാവുന്നത്. അവര്‍ക്കും ഇവര്‍ കൈമടക്ക് നല്‍കി വശത്താക്കിയാണ് കൊണ്ടുപോകുന്നത്.  ചെക്ക് പോസ്റ്റുകളിലും പരിശോധന ഇല്ല.
തണുപ്പ് സമയത്ത് ചൂടും എന്നാല്‍ ചൂട് സമയത്ത് തണുപ്പും നല്‍കുന്നതാണ് ഇത്തരം ശിലകള്‍. ചരിത്രത്തിലെ ചേര-ചോര- പാണ്ഡ്യ രാജവംശങ്ങളും മുഗള്‍ രാജവംശവും ടിപ്പുസുല്‍ത്താനും ഒക്കെ ഇത്തരം ശിലകളുടെ മേന്മയെകുറിച്ച് അറിയുകയും തങ്ങളുടെ കൊട്ടാരങ്ങള്‍ നിര്‍മ്മിക്കാന്‍ ഉപയോഗിച്ചിട്ടുണ്ട്.
ബ്രിട്ടീഷ് ഭരണകാലത്ത് ഇത്തരം ശിലകള്‍ വന്‍ തോതില്‍ ഇവിടെ നിന്നും ലണ്ടനിലേക്ക്  കൊണ്ടുപോയതായി രേഖകളുണ്ട്. അമിത ലാഭം നോക്കി വന്‍ തോതില്‍ ഇത്തരം ശിലകള്‍ കടത്തുന്നത് ഭാവിയില്‍ വന്‍ പാരിസ്ഥിതിക ദുരന്തത്തിന് ഇടവരുത്തുമെന്നും ചൂണ്ടികാട്ടപ്പെടുന്നു.