മാനാസ് (കിര്‍ഗിസ്ഥാന്‍): തുര്‍ക്കി കാര്‍ഗോ ജെറ്റ് വിമാനം കിര്‍ഗിസ്ഥാനിലെ മാനാസ് എയര്‍പോര്‍ട്ടിനടുത്തുള്ള ജനവാസ കേന്ദ്രത്തില്‍ തകര്‍ന്നു വീണ് 37 പേര്‍ മരിച്ചു. കനത്ത മൂടല്‍മഞ്ഞിനിടെയാണ് അപകടം. നാല് പൈലറ്റുമാര്‍ ഉള്‍പ്പെടെയുള്ള ജീവനക്കാരും മരിച്ചു. ആറു കുട്ടികളും ഉള്‍പ്പെടും. ഒരു വീടിനു മുകളിലേക്കാണ് വിമാനം കൂപ്പുകുത്തിയത്. ഈ പ്രദേശത്തുള്ളവരും മരിച്ചവരില്‍ ഉള്‍പ്പെടും. ബോയിങ് 747 വിഭാഗത്തില്‍പ്പെട്ട വിമാനമാണ് തകര്‍ന്നത്. കിര്‍ഗിസ്ഥാനിലെ തലസ്ഥാനമായ ബിഷ്‌കെകിന് 25 കി.മി അകലെയാണ് അപകടം. രാജ്യത്തെ പ്രധാന വിമാനത്താവളമാണ് മാനാസിലേത്.
രാവിലെ 7.31ന് വിമാനം ലാന്റ് ചെയ്യാന്‍ ശ്രമിക്കവെയാണ് തകര്‍ന്നത്. മഞ്ഞുവീഴ്ചയെ തുടര്‍ന്ന് കാഴ്ചാപരിധി വളരെ കുറവായിരുന്നു. മാനാസിനടുത്തെ ദാച്ചാ സു എന്ന ഗ്രാമത്തിലാണ് വിമാനം വീണത്. ഗ്രാമത്തിലെ 15 കെട്ടിടങ്ങള്‍ തകര്‍ന്നു. മരിച്ച പൈലറ്റുമാരില്‍ ഒരാളുടെ മൃതദേഹം കണ്ടെത്താനായിട്ടില്ല. അപകടത്തെ തുടര്‍ന്ന് വിമാനത്താവളം അടയ്്ക്കുകയും വിമാനങ്ങള്‍ റദ്ദാക്കുകയും ചെയ്തു.