തൃശൂര്‍: വൈദ്യുത വിഭാഗത്തിന്റെ പ്രവര്‍ത്തന മേഖലകള്‍ മെച്ചപ്പെടുത്തുന്നതിന് കോര്‍പറേഷന്‍ ആധുനിക ഉപകരണങ്ങള്‍ വാങ്ങി. പത്തുലക്ഷത്തി നാലായിരത്തി അറുനൂറ്റി ഇരുപത്തിയഞ്ചു രൂപ വരുന്ന അഞ്ചു പ്രധാന ഉപകരണങ്ങളാണ് വൈദ്യുത വിഭാഗത്തിലേക്ക് വാങ്ങിയത്.
ടെന്‍ഡര്‍ പ്രകാരം ഫ്‌ളൂക്ക് എന്ന കമ്പനിയുടെ പവര്‍ ക്വാളിറ്റി അനലൈസര്‍, തെര്‍മല്‍ ഇമേജിങ് ക്യാമറ, വോള്‍ട്ടേജ് ഡിറ്റക്ടര്‍, എര്‍ത്ത് ഗ്രൗണ്ട് ടെസ്റ്റര്‍, ലക്‌സ് മീറ്റര്‍ എന്നിവയാണ് ഉപകരണങ്ങള്‍.
ഇലക്ട്രിക് ലൈനുകളില്‍ ഉണ്ടാകുന്ന അണ്‍ബാലന്‍സിങ്, വോള്‍ട്ടേജ് വ്യതിയാനം, ഹാര്‍മോണിക് കറന്റുകള്‍ എന്നിവ കണ്ടുപിടിക്കുന്നതിനും ഉപയോഗപ്പെടുത്തുന്നതിനുമാണ് പവര്‍ ക്വാളിറ്റി അനലൈസര്‍ ഉപയോഗിക്കുന്നത്. വൈദ്യുതി ചോര്‍ച്ച കണ്ടെത്താന്‍ കഴിയുന്നതാണ് ഇതിന്റെ സവിശേഷത.
സബ്‌സ്‌റ്റേഷനുകള്‍, ഡിസ്ട്രിബ്യൂഷന്‍ ട്രാന്‍സ്‌ഫോര്‍മറുകള്‍, ലൈന്‍ വര്‍ക്കുകള്‍ എന്നിവിടങ്ങളില്‍ ഉണ്ടാകുന്ന വൈദ്യുതി നഷ്ടം കണ്ടുപിടിക്കുന്നതിന് തെര്‍മല്‍ ഇമേജിങ് ടെക്‌നോളജിയ്ക്ക് കഴിയും. കൂടാതെ ബ്രേക്ക് ഡൗണ്‍ മെയിന്റനന്‍സ് വിഭാഗത്തിന്റെ പ്രവര്‍ത്തനം മെച്ചപ്പെടുത്താനും ഉപകരിക്കുന്നു.
ഇലക്ട്രിക് ലൈനുകളില്‍ ജോലിയെടുക്കുന്ന ജീവനക്കാരുടെ സുരക്ഷിതത്വം ഉറപ്പു വരുത്താനാകുന്ന ക്വാളിറ്റി ഉപകരണമാണ് വോള്‍ട്ടേജ് ഡിറ്റക്ടര്‍. ബെല്‍റ്റ്, ഹെല്‍മറ്റ്, ടെസ്റ്റര്‍ എന്നിവയ്ക്കു പുറമേ കൂടുതല്‍ സുരക്ഷ നല്‍കുന്ന വോള്‍ട്ടേജ് ഡിറ്റക്ടര്‍ ജോലി സമയത്ത് ലൈനില്‍ വൈദ്യുതി ഇല്ലെന്ന് ഉറപ്പു വരുത്താന്‍ സഹായിക്കുന്ന ഉപകരണമാണ്.
വൈദ്യുതി വിതരണ ശൃംഖലയുടെ അവിഭാജ്യ ഘടകമായ ട്രാന്‍സ്‌ഫോര്‍മറുടെ എര്‍ത്തിംങ് സംവിധാനം കുറ്റമറ്റതാക്കാന്‍ ഉപയോഗിക്കുന്ന നൂതന ഉപകരണമാണ് എര്‍ത്ത് ഗ്രൗണ്ട് ടെസ്റ്റര്‍. മെയിന്റന്‍സ് വിഭാഗത്തിന് ഫലപ്രദമായ ഉപകരണമാണ് ഇത്. വൈദ്യുത വിഭാഗത്തിന് സ്ട്രീറ്റ് ലൈറ്റ് സംവിധാനം സ്ഥാപിക്കുമ്പോള്‍ ആവശ്യത്തിന് വെളിച്ചം കൃത്യ സ്ഥലത്ത് ലഭ്യമാക്കാന്‍ ഉപയോഗിക്കുന്ന ലക്‌സ് മീറ്ററാണ് മറ്റൊന്ന്. വെളിച്ചം കൃത്യമായി ഉറപ്പു വരുത്താന്‍ കഴിയുമെന്നതാണ് പ്രത്യേകത. ടെണ്ടര്‍ പ്രകാരം ഓഫര്‍ ലഭിച്ച നാലു കമ്പനികളില്‍ നിന്നാണ് കോര്‍പറേഷന്‍ വൈദ്യുത വിഭാഗം ഫ്‌ളൂക്ക് തെരഞ്ഞെടുത്തത്.
പത്രസമ്മേളനത്തില്‍ മേയര്‍ അജിത ജയരാജന്‍, കോര്‍പറേഷന്‍ ഇലക്ട്രിക്കല്‍ എഞ്ചിനീയര്‍ ടി.എസ് ജോസ്, ഡയറക്ഷന്‍ അസിസ്റ്റന്റ് എന്‍ജിനീയര്‍ എ.വേലുസ്വാമി, പ്രോജക്ട് എന്‍ജിനീയര്‍ ഫ്രാന്‍സിസ് സേവ്യര്‍, ഫ്‌ളൂക്ക് ഇന്ത്യന്‍ സെയില്‍സ് എന്‍ജിനീയര്‍ എം. ഭരണീധരന്‍ എന്നിവര്‍ പങ്കെടുത്തു.