കോഴിക്കോട്: സംസ്ഥാന ജൂനിയര്‍ അന്തര്‍ജില്ലാ ഫുട്‌ബോള്‍ ചാംപ്യന്‍ഷിപ്പിന്റെ ഫൈനലില്‍ കോഴിക്കോടും മലപ്പുറവും തമ്മില്‍ ഏറ്റുമുട്ടും. എതിരില്ലാത്ത ഒരു ഗോളിനു ആലപ്പുഴയെ പരാജയപ്പെടുത്തിയാണ് മലപ്പുറം ഫൈനലില്‍ പ്രവേശിച്ചത്. തൃശൂരിനെ മറുപടിയില്ലാത്ത ഒറ്റ ഗോളിനു വീഴ്ത്തിയാണ് കോഴിക്കോട് കലാശപ്പോരിനെത്തുന്നത്. 

മലപ്പുറത്തിനു വേണ്ടണ്ടി 12ാം മിനുട്ടില്‍ അബ്ദുല്‍ റാഷിദാണ് ഗോള്‍ നേടിയത്. തൃശൂരും കോഴിക്കോടും തമ്മില്‍ നടന്ന രണ്ടാം സെമി ഫൈനലിന്റെ ആദ്യ പകുതിയില്‍ ഇരു ടീമുകളും പൊരുതിക്കളിച്ചെങ്കിലും ഗോളെന്നും നേടാനായില്ല. ആദ്യ പകുതിയില്‍ ഗോള്‍ നേടാന്‍ കോഴിക്കോടിന്റെ ക്യാപ്റ്റന്‍ ലാമിസിനു രണ്ടിലധികം തവണ സുവര്‍ണാവസരം ലഭിച്ചെങ്കിലും പന്ത് വലയിലെത്തിക്കാനായില്ല. രണ്ടാം പകുതിക്കു ശേഷം 43ാം മിനുട്ടില്‍ ലാമിസ് തന്നെ പന്ത് വലയിലെത്തിച്ച് ടീമിനെ വിജയിപ്പിക്കുകയായിരുന്നു. ഇന്നു വൈകിട്ട് 4.30നു നടക്കുന്ന ഫൈനലില്‍ മലപ്പുറം കോഴിക്കോടിനെ നേരിടും. രാവിലെ ഏഴിനു ലൂസേഴ്‌സ് ഫൈനലില്‍ തൃശൂരും ആലപ്പുഴയും ഏറ്റുമുട്ടും. സംസ്ഥാന സ്‌പോര്‍ട്‌സ് കൗണ്‍സില്‍ പ്രസിഡന്റ് ടി.പി ദാസന്‍ വിജയികള്‍ക്കു ട്രോഫി സമ്മാനിക്കും.