ന്യൂഡല്‍ഹി: സര്‍വീസിലെ മോശം പ്രകടനത്തെത്തുടര്‍ന്ന് രണ്ട് ഐ.പി.എസ് ഉദ്യോഗസ്ഥരോട് സര്‍ക്കാര്‍ നിര്‍ബന്ധിതമായി വിരമിക്കാന്‍ നിര്‍ദേശം നല്‍കി. തുടര്‍ന്ന് ഇരുവരും വിരമിച്ചു. സിവില്‍ സര്‍വീസ് ചരിത്രത്തിലെ അത്യപൂര്‍വ സംഭവമാണിത്. 1992 ബാച്ചിലെ ഛത്തീസ്ഗഡ് കേഡറിലുള്ള രാജ്കുമാര്‍ ദേവാംഗന്‍, 1998 ബാച്ചിലെ കേന്ദ്ര ഭരണപ്രദേശ കേഡറിലുള്ള മായങ്ക് ഷീല്‍ ചൗഹാന്‍ എന്നിവരേയാണ് നിര്‍ബന്ധിതമായി സര്‍വീസ് അവസാനിപ്പിക്കാന്‍ സര്‍ക്കാര്‍ നിര്‍ദേശിച്ചത്.
15 മുതല്‍ 25 വര്‍ഷത്തെ സര്‍വീസ് ചരിത്രം പരിശോധിച്ച് മോശം പ്രകടനം കാഴ്ചവയ്ക്കുന്നവരെ നിര്‍ബന്ധിത വിരമിക്കലിന് വിധേയമാക്കാം. ഇത്തരത്തിലുള്ള അഖിലേന്ത്യാ സര്‍വീസ് റൂള്‍ പ്രകാരമാണ് രണ്ട് ഉദ്യോഗസ്ഥരേയും നിര്‍ബന്ധിത വിരമിക്കലിന് സര്‍ക്കാര്‍ വിധേയമാക്കിയത്. പൊതുതാല്‍പര്യം മുന്‍നിര്‍ത്തിയാണ് ഇവരെ സര്‍വീസില്‍ നിന്ന് നിര്‍ബന്ധിതമായി വിരമിപ്പിച്ചതെന്ന് ആഭ്യന്തര മന്ത്രാലയം അറിയിച്ചു. ക്യാബിനറ്റിലെ നിയമന കമ്മിറ്റിയുടെ ശുപാര്‍ശപ്രകാരം മൂന്നുമാസത്തെ ശമ്പളം മുന്‍കൂറായി നല്‍കുകയും നിര്‍ബന്ധിത വിരമിക്കല്‍ പ്രകാരമുള്ള ആനുകൂല്യങ്ങളും നല്‍കിയാണ് ഇവരുടെ സര്‍വീസ് അവസാനിപ്പിച്ചത്.