കോട്ടയം: ഇന്ത്യന്‍ ഡെന്റല്‍ അസോസിയേഷന്‍ 49-ാമത് സംസ്ഥാന സമ്മേളനം 'കോഡാക് 17' 20 മുതല്‍ 22 വരെ കോട്ടയത്ത് നടക്കും. ഹോട്ടല്‍ വിന്‍സര്‍ കാസിലില്‍ ചേരുന്ന സമ്മേളനത്തില്‍ 3000ത്തോളം പ്രതിനിധികള്‍ പങ്കെടുക്കും. ദന്ത ചികിത്സാ രംഗത്തെ നൂതന സാങ്കേതിക വിദ്യകളും ചികിത്സാ രീതികളും അതതു ശാഖകളിലെ വിദഗ്ധര്‍ പ്രതിനിധികള്‍ക്ക് പരിചയപ്പെടുത്തും.
20ന് രാവിലെ ഒന്‍പതിന് കോട്ടയം ഗവ ഡെന്റല്‍ കോളജില്‍ ചേരുന്ന സമ്മേളനത്തില്‍ പഠന ശില്‍പ്പശാലകളുടെ ഉദ്ഘാടനം മെഡിക്കല്‍ കോളജ് പ്രിന്‍സിപ്പല്‍ ഡോ ജോസ് ജോസഫ് നിര്‍വഹിക്കും.
അസോസിയേഷന്‍ സംസ്ഥാന പ്രസിഡന്റ് ഡോ മുഹമ്മദ് സമീര്‍ അധ്യക്ഷനാകും. ഡന്റല്‍ കോളജ് പ്രിന്‍സിപ്പല്‍ ഡോ കെ ജോര്‍ജ്ജ് വര്‍ഗ്ഗീസ് മുഖ്യപ്രഭാഷണം നടത്തും. വൈകുന്നേരം ആറിന് കോട്ടയം സിറ്റിസണ്‍സ് ക്ലബ്ബില്‍ നടക്കുന്ന ഉദ്ഘാടന സമ്മേളനത്തില്‍ മന്ത്രി ഷൈലജ ടീച്ചര്‍ മുഖ്യാതിഥിയാവും.മുന്‍ എം.എല്‍.എ വി.എന്‍ വാസവന്‍ സാങ്കേതിക വ്യാപാരമേളയും, തിരുവഞ്ചൂര്‍ രാധാകൃഷ്ണന്‍ എം.എല്‍.എ ശാസ്ത്ര സമ്മേളനങ്ങളും ഉദ്ഘാടനം ചെയ്യും.