എരുമപ്പെട്ടി: വൃക്ക സംബന്ധമായ അസുഖം പിടിപ്പെട്ട് ഗുരുതരാവസ്ഥയില്‍ എറണാംകുളം അമൃത ആശുപത്രിയില്‍ ചികിത്സയില്‍ കഴിയുന്ന എരുമപ്പെട്ടി ഹയര്‍ സെക്കന്‍ഡറി സ്‌കൂളിലെ ആറാം ക്ലാസ് വിദ്യാര്‍ഥി സെയ്ത് മുഹമ്മദ് അല്‍ അമീന് ചികിത്സ സഹായം നല്‍കി കൊണ്ട് എരുമപ്പെട്ടി നിര്‍മല ഇഗ്ലീഷ് മീഡിയം സ്‌കൂള്‍ മാതൃകയായി. എരുമപ്പെട്ടി സ്വദേശി ഫൈസല്‍കോയ തങ്ങളുടെ മകന്‍ 11 വയസുകാരനായ സെയ്ത് മുഹമ്മദ് അല്‍ അമീന്റെ ഇരു വൃക്കകളും പ്രവര്‍ത്തനം നിലച്ച് കൊണ്ടിരിക്കുന്ന അവസ്ഥയിലായിരിക്കുകയാണ്. ഇതിന് പുറമെ ശരീരത്തില്‍ രക്തം കട്ടപിടിച്ച് കൊണ്ടിരിക്കുന്ന അപൂര്‍വ രോഗാവസ്ഥയും ഉണ്ട്. തീവ്ര പരിചരണ വിഭാഗത്തില്‍ കഴിയുന്ന കുട്ടിക്ക് വിദഗ്ധ ചികിത്സ നല്‍കിയാല്‍ ജീവന്‍ രക്ഷിക്കാന്‍ കഴിയുമെന്നാണ് ഡോക്ടര്‍മാര്‍ അറിയിച്ചത്. ഇതിന് 5 ലക്ഷം രൂപയിലധികം ചിലവാണ് പ്രതീക്ഷിക്കുന്നത്.
വാടക വീട്ടില്‍ താമസിക്കുന്ന നിര്‍ധന കുടുംബത്തിന് ഇത് താങ്ങാവുന്നതിലും അധികമാണ്. ഈ സാഹചര്യത്തിലാണ് എരുമപ്പെട്ടി നിര്‍മല ഇംഗ്ലീഷ് മീഡിയം സ്‌കൂള്‍ സഹായമായി രംഗത്തെത്തിയത്. സ്‌കൂളിന്റെ സഹായ നിധിയില്‍ നിന്ന് 10000 രൂപയും, സ്‌കൂള്‍ ചീഫ് കോഡിനേറ്റര്‍ റിട്ടേര്‍ഡ് മേജര്‍ ജോസഫ് 5000 രൂപയും ചികിത്സ സഹായമായി നല്‍കി. സ്‌കൂളില്‍ നടന്ന ചടങ്ങില്‍ സ്‌കൂള്‍ മാനേജരും എരുമപ്പെട്ടി ഫൊറോന വികാരിയുമായ ഫാദര്‍ പോള്‍ താണിക്കല്‍, മാധ്യമ സാമൂഹിക പ്രവര്‍ത്തകനായ റഷീദ് എരുമപ്പെട്ടിക്ക് ധന സഹായം കൈമാറി. എരുമപ്പെട്ടി പ്രസ് ക്ലബ്ബ് പ്രസിഡന്റ് കബീര്‍ കടങ്ങോട് പ്രധാന അധ്യാപിക സിസ്റ്റര്‍ ടില്‍സി, ചീഫ് കോഡിനേറ്റര്‍ റിട്ടേര്‍ഡ് മേജര്‍ ജോസഫ് എന്നിവര്‍ ചടങ്ങില്‍ പങ്കെടുത്തു.