സംസ്ഥാന സ്‌കൂള്‍ കലോത്സവം അഞ്ചാംദിനത്തിലെത്തിയപ്പോള്‍ കഴിഞ്ഞവര്‍ഷത്തെ ചാംപ്യന്‍മാരായ കോഴിക്കോടും രണ്ടാംസ്ഥാനക്കാരായ പാലക്കാടും തമ്മില്‍ സ്വര്‍ണക്കപ്പിനായി ഇഞ്ചോടിഞ്ച് പോരാട്ടം. കഴിഞ്ഞ രണ്ടുദിവസങ്ങളില്‍ രാത്രി വൈകി മത്സരങ്ങള്‍ അവസാനിച്ചപ്പോള്‍ ഇരുജില്ലകള്‍ക്കും തുല്യമായിരുന്നു പോയിന്റ് നില. ഇന്നു വൈകുന്നേരം നാലുവരെ 653 പോയിന്റുമായി കോഴിക്കോട് മേല്‍ക്കൈ നേടിയപ്പോള്‍ 651 പോയിന്റുമായി പാലക്കാട് തൊട്ടുപിന്നിലുണ്ട്.

ഹൈസ്‌കൂള്‍ വിഭാഗത്തില്‍ 294 പോയിന്റും എച്ച്.എസ്.എസ് വിഭാഗത്തില്‍ 364 പോയിന്റും നേടിയാണു കോഴിക്കോട് ആദ്യമെത്തിയത്. എച്ച്.എസ് വിഭാഗത്തില്‍ 298, എച്ച്.എസ്.എസ് വിഭാഗത്തില്‍ 358 എന്നിങ്ങനെ പോയിന്റുമായാണു പാലക്കാടന്‍ കുതിപ്പ്.

നാളെ രാത്രി മത്സരം അവസാനിക്കുന്നതോടെ കിരീടം ആര്‍ക്കെന്ന കാര്യത്തില്‍ വ്യക്തതയുണ്ടാകും. ജനപ്രിയ ഇനങ്ങളായ പരിചമുട്ട് കളി, അറബന മുട്ട്, സംഘനൃത്തം, ഓട്ടന്‍തുള്ളല്‍ തുടങ്ങിയ ഇനങ്ങള്‍ നാളെ കലോത്സവ വേദികളില്‍ അരങ്ങിലെത്തുന്നുണ്ട്.