ദുബൈ: ഇന്ത്യന്‍ ക്യാപ്റ്റന്‍ വിരാട് കോഹ്‌ലി ഐ.സി.സി ടെസ്റ്റ് ബാറ്റ്‌സ്മാന്മാരുടെ റാങ്കിങില്‍ രണ്ടാം സ്ഥാനം നിലനിര്‍ത്തി. ആസ്‌ത്രേലിയന്‍ ക്യാപ്റ്റന്‍ സ്റ്റീവന്‍ സ്മിത്താണ് ഒന്നാം സ്ഥാനത്ത്. അതേസമയം ആഷസ് നാലാം ടെസ്റ്റില്‍ ഇരട്ട സെഞ്ച്വറി നേടി പുറത്താകാതെ നിന്ന് മികച്ച ബാറ്റിങ് പുറത്തെടുത്ത മുന്‍ ഇംഗ്ലണ്ട് നായകന്‍ അലിസ്റ്റര്‍ കുക്ക് റാങ്കിങില്‍ നേട്ടമുണ്ടാക്കി. ഒറ്റയടിക്ക് ഒന്‍പത് സ്ഥാനങ്ങള്‍ മെച്ചപ്പെടുത്തി കുക്ക് എട്ടാം സ്ഥാനത്തേക്ക് കയറി. ഇന്ത്യന്‍ താരം ചേതേശ്വര്‍ പൂജാര മൂന്നാം റാങ്കില്‍ തുടരുന്നു. ഇംഗ്ലണ്ട് ക്യാപ്റ്റന്‍ ജോ റൂട്ടും നില മെച്ചപ്പെടുത്തി. ഒരു സ്ഥാനം ഉയര്‍ന്ന് റൂട്ട് നാലാം സ്ഥാനം ന്യൂസിലന്‍ഡ് ക്യാപ്റ്റന്‍ കെയ്ന്‍ വില്ല്യംസിനൊപ്പം പങ്കിടുന്നു.
ബൗളര്‍മാരുടെ റാങ്കിങിലെ ആദ്യ ഒന്‍പത് സ്ഥാനങ്ങളില്‍ മാറ്റമില്ല. ഇംഗ്ലീഷ് പേസര്‍ ജെയിംസ് ആന്‍ഡേഴ്‌സനാണ് ഒന്നാം സ്ഥാനത്ത്. ദക്ഷിണാഫ്രിക്കന്‍ താരം മോണ്‍ മോര്‍ക്കല്‍ പത്താം സ്ഥാനത്തേക്ക് കയറിയതാണ് ഏക മാറ്റം. ഇന്ത്യയുടെ രവീന്ദ്ര ജഡേജ മൂന്നാമതും ആര്‍ അശ്വിന്‍ നാലാം സ്ഥാനത്തും നില്‍ക്കുന്നു. ഓള്‍റൗണ്ടര്‍ പട്ടികയില്‍ ജഡേജ രണ്ടാമതും അശ്വിന്‍ മൂന്നാം സ്ഥാനത്തും.