തളിപ്പറമ്പ്: വയല്‍ക്കിളികളുടെ നേതൃത്വത്തില്‍ ദേശീയപാതാ വിരുദ്ധ സമരത്തില്‍ പങ്കെടുത്തതിന്റെ പേരില്‍ കീഴാറ്റൂരില്‍ സി.പി.എം അംഗങ്ങള്‍ക്കെതിരേ അച്ചടക്ക നടപടി. കീഴാറ്റൂര്‍ സെന്‍ട്രല്‍, കീഴാറ്റൂര്‍ വടക്ക് ബ്രാഞ്ചുകളില്‍ നിന്നുള്ള പതിനൊന്ന് അംഗങ്ങളെ പാര്‍ട്ടിയില്‍ നിന്ന് പുറത്താക്കി. സെന്‍ട്രല്‍ ബ്രാഞ്ചില്‍ നിന്നുള്ള ഒന്‍പത് പേരെയും കീഴാറ്റൂര്‍ വടക്ക് ബ്രാഞ്ചിലെ രണ്ടു പേരെയുമാണ് പുറത്താക്കിയത്.
സെന്‍ട്രല്‍ ബ്രാഞ്ചില്‍ നിന്നുള്ള സി.ശശി, എം.ബൈജു, ബിജു, രാഹുല്‍, പ്രിന്‍സ്, ബാലന്‍, രാമകൃഷ്ണന്‍, രജിത്ത്, ബി.ഗോവിന്ദന്‍, വടക്ക് ബ്രാഞ്ചിലെ കെ.വി ബാലകൃഷ്ണന്‍, ലാലുപ്രസാദ് എന്നിവര്‍ക്കെതിരേയാണ് നടപടി. ഇവരോട് നേരത്തെ തന്നെ പാര്‍ട്ടി വിശദീകരണം ചോദിച്ചിരുന്നു. എന്നാല്‍ രണ്ട് പേര്‍ മാത്രമാണ് വിശദീകരണം നല്‍കിയത്. ഈ വിശദീകരണത്തില്‍ പാര്‍ട്ടി നേതൃത്വം തൃപ്തരായിരുന്നുമില്ല. ഈ സാഹചര്യത്തിലാണ് 11 പേരെ പാര്‍ട്ടിയില്‍ നിന്ന് പുറത്താക്കിയത്.
പാര്‍ട്ടി ഏറ്റവും ശക്തമായി നിലനില്‍ക്കുന്ന ഗ്രാമത്തില്‍ രൂപം കൊണ്ട സമരം സര്‍ക്കാരിനെയും പാര്‍ട്ടിയെയും ഒരു പോലെ പ്രതിക്കൂട്ടിലാക്കിയിരുന്നു. കീഴാറ്റൂരിലെ പ്രവര്‍ത്തകര്‍ക്കു പുറമെ വിവിധ രാഷ്ട്രീയ സാംസ്‌ക്കാരിക സംഘടനകളില്‍ നിന്നും സമരത്തിനു പിന്തുണലഭിച്ചിരുന്നു. ഭൂരിഭാഗം പ്രവര്‍ത്തകരും പരസ്യമായി തന്നെ സമരക്കാര്‍ക്ക് അനുകൂല നിലപാട് സ്വീകരിച്ചു. ഇതാണ് സമരാനുകൂല അംഗങ്ങള്‍ക്കെതിരേ നടപടി വൈകിയത്. ഡിസംബര്‍ 31ന് ഉച്ചക്ക് രണ്ടു മുതല്‍ വയല്‍ക്കിളികളുടെ നേതൃത്വത്തില്‍ കീഴാറ്റൂരില്‍ നടത്താനിരുന്ന സമര വാര്‍ഷികത്തിനും പുതുവത്സരാഘോഷത്തിനും പരിസ്ഥിതി പ്രദര്‍ശനത്തിനും അവസാന നിമിഷം അനുമതി നിക്ഷേധിച്ച പൊലിസ് നടപടിയില്‍ പ്രതിഷേധിച്ച് സ്ത്രീകളും കുട്ടികളുമുള്‍പ്പെടെ നൂറോളം വയല്‍ക്കിളി പ്രവര്‍ത്തകര്‍ തളിപ്പറമ്പ് പൊലിസ് സ്റ്റേഷന്‍ ഉപരോധിച്ചിരുന്നു. ഇതിലും പാര്‍ട്ടി പ്രവര്‍ത്തകരുടെ പങ്കാളിത്തം ഉണ്ടായതോടെയാണ് നടപടികള്‍ വേഗത്തിലാക്കിയത്. ബ്രാഞ്ചു തലത്തില്‍ ഉള്ള തീരുമാനത്തിന് മേല്‍ ഘടകങ്ങളുടെ അംഗീകാരം ആവശ്യമാണെന്നുള്ളതിനാല്‍ പാര്‍ട്ടി കേന്ദ്രങ്ങളില്‍ നിന്ന് ഔദ്യോഗിക വിശദീകരണം ഇതുവരെ ഉണ്ടായിട്ടില്ല.