മഞ്ചേരി: നഗരസഭയിലെ പാവപ്പെട്ട ജനങ്ങള്‍ക്ക് അവകാശപ്പെട്ട ഭവന പദ്ധതികള്‍ നഗരസഭ അട്ടിമറിക്കുകയാണെന്ന് നഗരസഭ പ്രതിപക്ഷം പത്രസമ്മേളനത്തില്‍ ആരോപിച്ചു. ഭൂരഹിതരും ഭവന രഹിതരുമായ ആളുകള്‍ക്ക് വീട് നിര്‍മിച്ചുനല്‍കാന്‍ ആവശ്യമായ സ്ഥലം കണ്ടെത്താന്‍ നഗരസഭ തയാറാകുന്നില്ല.
അനുയോജ്യമായ സ്ഥലം കണ്ടെത്താന്‍ സാധിക്കുന്നില്ലെന്നു പറഞ്ഞാണ് പദ്ധതി അട്ടിമറിക്കാന്‍ ശ്രമിക്കുന്നത്.അനുയോജ്യമായ ഭൂമി നഗരസഭക്കകത്തു ഉണ്ടെന്നിരിക്കേ ഇത്തരം വിശദീകരണം നല്‍കുന്നത് വിരോധാഭാസമാണ്. ശിഹാബ് തങ്ങള്‍ ഭവന പദ്ധതി, ഇ.എം.എസ് ഭവന പദ്ധതി തുടങ്ങി ഒട്ടേറെ തുടങ്ങിവച്ച പദ്ധതികള്‍ പാതിവഴിയിലാണ്.
സര്‍ക്കാര്‍ പ്രഖ്യാപിച്ച നാലു മിഷന്‍ പദ്ധതികളും നഗരസഭ അട്ടിമറിച്ചു. സമഗ്ര വിദ്യാഭ്യാസ പദ്ധതിയും വിദ്യാലയങ്ങള്‍ ഹൈടെക്ക് ആക്കുന്ന പ്രത്യേക പദ്ധതികളും കടലാസില്‍ കിടക്കുകയാണ്. മാനിസ മഞ്ചേരി കൊണ്ടുവന്ന ശുചീകരണ പ്രവൃത്തികളെ തടസപെടുത്താനും ജനങ്ങളുടെ കണ്ണില്‍ പൊടിയിടാനും ഇപ്പോള്‍ നടപ്പാക്കുന്ന മാലിന്യ സംസ്‌കരണം പദ്ധതി ആത്മാര്‍ഥയില്ലാത്തതാണെന്നും പ്രതിപക്ഷം ആരോപിച്ചു.
കൗണ്‍സിലര്‍ അഡ്വ.കെ ഫിറോസ് ബാബു ,കെ.ഉബൈദ്, വി.അജിത്കുമാര്‍,നിസാറലി എന്ന കുട്ടിയാന്‍ എന്നിവര്‍ പത്രസമ്മേളനത്തില്‍ പങ്കെടുത്തു.