മലപ്പുറം: സി.പി.എം ജില്ലാ സമ്മേളനം അഞ്ചു മുതല്‍ ഏഴുവരെ പെരിന്തല്‍മണ്ണയില്‍ നടക്കുമെന്നു സംഘാടക സമിതി വാര്‍ത്താസമ്മേളനത്തില്‍ അറിയിച്ചു. അഞ്ചിന് രാവിലെ പെരിന്തല്‍മണ്ണ ടൗണ്‍ഹാളില്‍ പ്രതിനിധി സമ്മേളനം തുടങ്ങും. ജില്ലയില്‍ നിന്ന് തെരഞ്ഞെടുത്ത 294 പേരടക്കം 328 പേര്‍ പ്രതിനിധികള്‍ പങ്കെടുക്കും. ഏഴിന് രാവിലെ പുതിയ ജില്ലാ കമ്മിറ്റിയെ തെരഞ്ഞെടുക്കും. വൈകിട്ട് നാലിന് റെഡ് വളണ്ടിയര്‍ മാര്‍ച്ചും ബഹുജനറാലിയും തുടര്‍ന്ന് പടിപ്പുര സ്റ്റേഡിയത്തില്‍ ഫിഡല്‍ കാസ്‌ട്രോ നഗറില്‍ പൊതുസമ്മേളനവും നടക്കും.
സംസ്ഥാന സെക്രട്ടറി കോടിയേരി ബാലകൃഷ്ണന്‍ ഉദ്ഘാടനം ചെയ്യും. എ വിജയരാഘവന്‍, എളമരം കരീം, എ.കെ ബാലന്‍, പി.കെ ശ്രീമതി, മന്ത്രി കെ.കെ ശൈലജ ടീച്ചര്‍, ടി.പി രാമകൃഷ്ണന്‍, എം.വി ഗോവിന്ദന്‍ മാസ്റ്റര്‍, ബേബി ജോണ്‍, പാലോളി മുഹമ്മദ് കുട്ടി, മന്ത്രി കെ.ടി ജലീല്‍ സംസാരിക്കും. വാര്‍ത്താസമ്മേളനത്തില്‍ ജില്ലാ സെക്രട്ടറി പി.പി വാസുദേവന്‍, ടി.കെ ഹംസ, വി ശശികുമാര്‍, വി രമേശന്‍, ഇ.ഐ മോഹന്‍ദാസ് എന്നിവര്‍ പങ്കെടുത്തു.