കണ്ണൂര്‍:നഗരത്തില്‍ നടന്ന സംസ്ഥാന സ്‌കൂള്‍ കലോത്സവം ഹരിതാഭമാക്കിയ ഗ്രീന്‍ പ്രോട്ടോക്കോള്‍ കമ്മിറ്റിയുടെ പ്രവര്‍ത്തനത്തിന് അഭിനന്ദന പ്രവാഹം. സംഘാടന മികവുകൊണ്ട് ഗ്രീന്‍ പ്രോട്ടോക്കോള്‍ ആശയം പൂര്‍ണമായും നടപ്പില്‍ വരുത്തിയതിനാല്‍ ചരിത്രത്തിന്റെ ഭാഗമായി മാറിയിരിക്കുകയാണ് കണ്ണൂരില്‍ നടന്ന കലോത്സവം. ഏഴു ദിവസങ്ങളിലായി 20 വേദികളില്‍ 10 ലക്ഷം പേര്‍ പങ്കെടുത്തിട്ടും മാലിന്യമില്ലാത്ത കലോത്സവമായി പരിപാടിയെ മാറ്റിയെടുക്കാന്‍ കഴിഞ്ഞു.
വിവിധ സബ്കമ്മിറ്റികളുടെയും ജില്ലാ ശുചിത്വമിഷന്റെയും സഹകരണത്തോടെയുള്ള ഗ്രീന്‍ പ്രോട്ടോക്കോള്‍ കമ്മിറ്റിയുടെ പ്രവര്‍ത്തനം കലാമാമാങ്ക വേളയില്‍ കണ്ണൂരിലെത്തിയ മുഴുവന്‍ ജനതയും പൂര്‍ണമനസോടെ സ്വീകരിച്ചിരുന്നു. കലോത്സവം പൂര്‍ത്തിയായ ഉടന്‍ കലോത്സവനഗരി വൃത്തിയാക്കിയും കമ്മിറ്റി മാതൃകയായി.