നിലമ്പൂര്‍: ഉല്ലാസത്തിമര്‍പ്പിലെ അവധിക്കാലത്തോടു വിടചൊല്ലി പുതിയ പ്രതീക്ഷകളുമായി എത്തുന്നവര്‍ക്കു ഹൃദ്യമായ സ്വാഗതമോതാന്‍ തയ്യാറെടുക്കുകയാണ് ഓരോ വിദ്യാലയവും. ഓരോ കുട്ടിയിലും നിശ്ചിത പഠനനേട്ടം ഉറപ്പാക്കാന്‍ അധ്യാപകരെ പ്രാപ്തരാക്കുന്നതിനായി ജില്ലയിലെ ബി.ആര്‍.സികളില്‍ അവധിക്കാല അധ്യാപക പരിശീലനത്തിന്റെ ഒന്നാംഘട്ടം പൂര്‍ത്തിയായി.
നിലമ്പൂര്‍ ബി.ആര്‍.സിക്കു കീഴില്‍ 1200ഓളം അധ്യാപകര്‍ പങ്കെടുത്തു. ക്ലാസ്, വിഷയാടിസ്ഥാനത്തില്‍ അക്കാദമിക പ്രവര്‍ത്തനങ്ങള്‍, എസ്.ആര്‍.ജി, ക്ലാസ് പി.ടി.എ തുടങ്ങിയ വിദ്യാലയ പിന്തുണാ സംവിധാനങ്ങള്‍, മൂല്യനിര്‍ണയ വിശകലനം എന്നീ മേഖലകള്‍ക്ക് ഊന്നല്‍ നല്‍കിയാണ് അഞ്ചുദിവസത്തെ പരിശീലനം നടന്നത്. രണ്ടാംഘട്ട പരിശീലനം സമ്പൂര്‍ണ ഗുണമേന്മാ വിദ്യാലയം എന്ന ലക്ഷ്യം മുന്‍ നിര്‍ത്തിയുളളതാണ്.

സമന്വയം എന്ന പേരില്‍ എല്ലാ പഞ്ചായത്തു കേന്ദ്രങ്ങളിലും അധ്യാപക ശില്‍പശാല സംഘടിപ്പിക്കുന്നു. ഈ ഏകദിന പരിശീലനത്തിനു മുന്നോടിയായി ബ്ലോക്ക്തല പരിശീലനവും പ്രധാനാധ്യാപക പരിശീലനവും ബി.ആര്‍ സികളില്‍ പൂര്‍ത്തിയാക്കി. സമ്പൂര്‍ണ ഗുണമേന്‍മാ വിദ്യാലയം യാഥാര്‍ഥ്യമാക്കുന്നതിനുളള ചാലകശക്തിയായി തദ്ദേശസ്വയം ഭരണസ്ഥാപനങ്ങളും ജനപ്രതിനിധികളും അധ്യാപകസമൂഹവും പ്രവര്‍ത്തിക്കേണ്ടതുണ്ടെന്നു പരിശീലന ക്ലാസുകളില്‍ അഭിപ്രായമുയര്‍ന്നു.

ഈ മാസം 31 ന് എല്ലാ വിദ്യാലയങ്ങളിലും മുഴുവന്‍ അധ്യാപകരുടെയും പ്രാതിനിധ്യത്തോടെ ഈ അധ്യയന വര്‍ഷം നടപ്പിലാക്കുന്ന സവിശേഷ പ്രവര്‍ത്തനങ്ങളെക്കുറിച്ച് വിശദമായ ചര്‍ച്ചയും തീരുമാനങ്ങളും ഉണ്ടാകും.വിദ്യാര്‍ഥികള്‍ക്കാവശ്യമായ പാഠപുസ്തകങ്ങള്‍ സര്‍ക്കാര്‍ വിദ്യാലയങ്ങളിലെ അര്‍ഹരായ കുട്ടികള്‍ക്കുള്ള യൂനിഫോം എന്നിവ വിതരണത്തിനു സജ്ജമാക്കിയിട്ടുണ്ട്. പൊതു വിദ്യാലയങ്ങളിലെ അക്കാദമിക ഭൗതിക സാഹചര്യങ്ങള്‍ മെച്ചപ്പെടുത്തുന്നതിനായി സ്‌കൂള്‍ ഗ്രാന്റ്, മെയിന്റനന്‍സ് ഗ്രാന്റ്, ടീച്ചര്‍ ഗ്രാന്റ് എന്നിവ ജൂണ്‍ മാസത്തില്‍ തന്നെ ലഭ്യമാക്കുന്നതിനുളള നടപടികളും പൂര്‍ത്തിയായി.
വിദ്യാലയങ്ങളില്‍ എത്തിച്ചേരുന്ന പ്രത്യേക പരിഗണന അര്‍ഹിക്കുന്ന വിദ്യാര്‍ഥികളുടെ സര്‍വേ, അവര്‍ക്ക് നല്‍കേണ്ട സേവനങ്ങളുമായി ബന്ധപ്പെട്ട പ്രവര്‍ത്തനങ്ങള്‍ എന്നിവയുടെ മുന്നൊരുക്കം ബി.ആര്‍ സിയിലെ റിസോഴ്‌സ് അധ്യാപകര്‍ പൂര്‍ത്തിയാക്കിയിട്ടുണ്ട്. ജില്ലയുടെ വിദ്യാഭ്യാസരംഗത്തെ അഭൂത പൂര്‍ണമായ വളര്‍ച്ചക്കു വേണ്ടി പരിശ്രമിച്ച ജില്ലാ പഞ്ചായത്ത് വര്‍ഷാരംഭത്തില്‍ തന്നെ 4,5,7,8 ക്ലാസുകളിലെ കുട്ടികള്‍ക്കായി ബേസ് ലൈന്‍ ടെസ്റ്റ് നടത്തും. ഇതിനു ശേഷം ആവശ്യമായ പരിഹാര പ്രവര്‍ത്തനങ്ങളും നടത്തും.
നവാഗതരെ സ്വീകരിക്കുന്നതിനായി എല്ലാ വിദ്യാലയങ്ങളിലും വിപുലമായ തരത്തില്‍ പ്രവേശനോത്സവങ്ങള്‍ സംഘടിപ്പിക്കുന്നുണ്ട്. പ്രവേശനോത്സവം ആകര്‍ഷകമാക്കുന്നതിന് ബ്ലോക്ക്തല പ്രവേശനോത്സവം സ്വഗതസംഘം രൂപീകരിച്ചു പ്രവര്‍ത്തനങ്ങള്‍ ആരംഭിച്ചു. നിലമ്പൂര്‍ ബ്ലോക്ക് തല പ്രവേശനോത്സവം മുണ്ടേരി ഗവ ട്രൈബല്‍ യൂ പി സ്‌കൂളില്‍ പി.വി അന്‍വര്‍ എംഎല്‍എ ഉദ്ഘാടനം ചെയ്യും.