കോതമംഗലം: ഭൂതത്താന്‍കെട്ടിലെ വമ്പന്‍ ഭൂമാഫിയകളെ പിടിക്കാനൊരുങ്ങി വിജിലന്‍സ് സംഘം. ഭൂതത്താന്‍കെട്ടിലെ നിര്‍മാണ പ്രവര്‍ത്തനങ്ങളിലെ അഴിമതി വിജിലന്‍സ് സംഘം കഴിഞ്ഞദിവസം പരിശോധന നടത്തി. വിജിലന്‍സ് കൊച്ചി യൂനിറ്റിലെ ഡിവൈ.എസ്.പി എം.പി രമേശിന്റെ നേതൃത്വത്തിലുള്ള സംഘമാണ് ഇതുമായി ബന്ധപ്പെട്ട് അന്വേഷണം നടത്തുന്നത്. ഭൂതത്താന്‍കെട്ടില്‍ ജലസേചനവകുപ്പ് നടത്തിയ നിര്‍മാണങ്ങളെക്കുറിച്ച് ഉയര്‍ന്നിട്ടുള്ള അഴിമതിയാരോപണങ്ങളും നടന്നുവരുന്നതുമായ നിര്‍മാണങ്ങളിലെ ക്രമക്കേടുകളുമാണ് വിജിലന്‍സ് പരിശോധനക്ക് കാരണം.
യു.ഡി.എഫ് ഭരണകാലത്ത് ആസൂത്രണം ചെയ്ത് ഇവിടെനടപ്പിലാക്കിയ നിര്‍മാണ പ്രവര്‍ത്തനങ്ങള്‍സംമ്പന്ധിച്ച് തെളിവെടുപ്പിനാണ് വിജിലന്‍സ് ഡയറക്ടര്‍ നിര്‍ദേശം നലല്‍കിയിട്ടുള്ളത്. ഇവിടെ നടപ്പാക്കിയിട്ടുള്ള പദ്ധതികള്‍ക്കുവേണ്ടി ബാഹ്യഇടപെടലുകള്‍ ശക്തമായിരുന്നെന്നും ഇതുവഴി ജനപ്രതിനിധികളുള്‍പ്പെടെയുള്ള രാഷ്ടീയ ഉദ്യോഗസ്ഥമാഫിയകോടികള്‍ സമ്പാദിച്ചെന്നു മുള്ള ആരോപണത്തെ തുടര്‍ന്നാണ് പ്രദേശവാസിയായ ഒരാള്‍ വിജിലന്‍സില്‍ പരാതി നല്‍കിയത്.
വിജിലന്‍സ് സംഘം ഭൂതത്താന്‍കെട്ടിലെ നിര്‍മാണ പ്രവര്‍ത്തനങ്ങള്‍ പരിശോധിച്ചു തെളിവെടുത്തു. തുടര്‍ന്ന് ഭൂതത്താന്‍കെട്ടിലെ സബ്ബ് ഡിവിഷന്‍ ഓഫിസിലും സെക്ഷന്‍ ഓഫിസിലും പരിശോധന നടത്തി. പെരിയാര്‍ തീരത്ത് സ്ഥലം വാങ്ങികൂട്ടിയിട്ടുള്ള വമ്പന്‍ ഭൂവുടമകളുടെ സ്ഥലത്തേക്ക് റോഡ് സൗകര്യമൊരുക്കാന്‍ ഗവണ്‍മെന്റിനെ തെറ്റിദ്ധരിച്ച് ഉന്നത ഉദ്യോഗസ്ഥരും രാഷ്ട്രീയക്കാരുമടങ്ങുന്ന ലോബി ചെക്കുഡാം സ്ഥാപിക്കാന്‍ കര്‍മപദ്ധതി തയ്യാറാക്കുകയായിരുന്നെന്നും ഇതിനുപിന്നില്‍ വന്‍ സാമ്പത്തീക ഇടപെടല്‍ നടന്നിട്ടുണ്ടെന്നുമാണ് പരക്കെ ഉയര്‍ന്നിട്ടുള്ള ആരോപണം.