കൊട്ടിയൂര്‍: നെല്ലിയോടിയില്‍ പുലിയെ ചത്തനിലയില്‍ കണ്ടെത്തി. ചൊവ്വാഴ്ച വൈകുന്നേരം നാലോടെയാണ് നെല്ലിയോടിയിലെ മലയില്‍ ജോഷ്വയുടെ ആളൊഴിഞ്ഞ പറമ്പില്‍ പുലിയുടെ ജഢം കണ്ടെത്തിയത്. പറമ്പില്‍ ജോലി ചെയ്യുന്നതിനിടെയാണ് ദിവസങ്ങള്‍ പഴക്കമുള്ള ജഢം സ്ഥലം ഉടമയുടെ ശ്രദ്ധയില്‍പ്പെട്ടത്. വനംവകുപ്പ് ഉദ്യോഗസ്ഥരെ വിവരം അറിയിക്കുകയായിരുന്നു. കണ്ണൂര്‍ ഡി.എഫ്.ഒ സുനില്‍ പാമടി, കൊട്ടിയൂര്‍ റേഞ്ച് ഓഫിസര്‍ പ്രസാദ്, ഡെപ്യൂട്ടി റേഞ്ച് ഓഫിസര്‍ കെ.വി ആനന്ദ്, സെക്ഷന്‍ ഫോറസ്റ്റ് ഓഫിസര്‍ വി.ആര്‍ ഷാജി എന്നിവരുടെ സാന്നിധ്യത്തില്‍ കാക്കയങ്ങാട് വെറ്ററിനറി സര്‍ജന്‍ ഡോ. അരുണ്‍ പോസ്റ്റ്‌മോര്‍ട്ടം നടത്തി. പുലിക്ക് നാലു വയസ് പ്രായം ഉണ്ടെന്നും കാലിനേറ്റ പരുക്ക് മൂലം ഇരതേടാന്‍ കഴിയാത്തതാണ് മരണ കാരണമെന്നും വനംവകുപ്പ് ഉദ്യോഗസ്ഥര്‍ പറഞ്ഞു.