അങ്കാറ: 'മരണം നിഴല്‍ വിരിച്ചു നില്‍ക്കുന്ന ഈ മണ്ണിലെ കുഞ്ഞുങ്ങള്‍ക്കായി എന്തെങ്കിലും ചെയ്‌തേ പറ്റൂ..കാരണം അവര്‍ താങ്കളുടെ നാട്ടിലെ കുഞ്ഞുങ്ങളെ പോലെ തന്നെയാണ്'. ട്വിറ്റര്‍ ഗേളായി മാധ്യമങ്ങളില്‍ നിറഞ്ഞു നിന്ന ബന അല്‍ അബ്ദ് അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന് എഴുതുന്നു. ഇപ്പോള്‍ തുര്‍ക്കിയില്‍ കഴിയുന്ന ബന ട്രംപിന്റെ സ്ഥാനാരാഹോണത്തിനു മുമ്പ് തന്നെ കുറിച്ചു വെച്ചതാണ് കത്ത്. കഴിഞ്ഞ ഡിസംബറിലെ കൂട്ട പലായനത്തിലാണ് ബന തുര്‍ക്കിയിലെത്തിയത്.

' ഞാനിപ്പോള്‍ സമാധാനത്തിലാണ്. എന്നാല്‍ ചോരമണക്കുന്ന താഴ്‌വരയിലെ എന്റെ കൂട്ടുകാരെ കുറിച്ചോര്‍ക്കുമ്പോള്‍ എനിക്ക് സമാധാനിക്കാനാവുന്നില്ല' ബന എഴുതുന്നു. കുട്ടുകാര്‍ കൂടി തന്നോടൊപ്പമുണ്ടായിരുന്നെങ്കിലെന്ന് ആഗ്രഹം പ്രകടിപ്പിക്കുന്ന ബന അലപ്പോ മരണത്തിന്റെ നഗരമാണെന്നും പറയുന്നു.

കുഞ്ഞു ബനയുടെ എഴുത്തിന്റെ പൂര്‍ണ രൂപം

'പ്രിയപ്പെട്ട ഡൊണാള്‍ഡ് ട്രംപ്,
എന്റെ പേര് ബന അല്‍ അബ്ദ്. ഞാന്‍ അലപ്പൊയില്‍ നിന്നുള്ള ഏഴു വയസ്സുകാരിയാണ്. സിറിയയിലാണ് ഞാന്‍ ഇത്രയും നാള്‍ ജീവിച്ചത്. കഴിഞ്ഞ ഡിസംബറില്‍ അലപ്പോ വിടുന്നതു വരെ. യുദ്ധത്തില്‍ പ്രയാസപ്പെടുന്ന സിറിയന്‍ ബാല്യങ്ങളില്‍ ഒരാള്‍ തന്നെയാണ് ഞാനും.
എന്നാല്‍, ഇപ്പോള്‍ എനിക്ക് സമാധാനമുണ്ട്. തുര്‍ക്കിയിലെ എന്റെ പുതിയ വീട്ടില്‍. അലപ്പോയില്‍ ഞാന്‍ സ്‌കൂളില്‍ പഠിച്ചിരുന്നു. എന്നാല്‍ അത് ബോംബിട്ട് തകര്‍ത്തു കളഞ്ഞു. എന്റെ കുറച്ചു കൂട്ടുകാരും അതില്‍ മരിച്ചു. എനിക്ക് കൂട്ടുകാരെ കുറിച്ച് ഓര്‍ക്കുമ്പോള്‍ വല്ലാത്ത സങ്കടം തോന്നുന്നു. അവരും എന്നോടൊപ്പമുണ്ടായിരുന്നെങ്കിലെന്ന് ആശിച്ചു പോവുന്നു. അലപ്പോയില്‍ എനിക്ക് കളിക്കാന്‍ കഴിയുമായിരുന്നില്ല. അത് മരണത്തിന്റെ നഗരമാണ്.

ഇവിടെ, തുര്‍ക്കിയില്‍ എനിക്ക് പുറത്തു പോവാനും കളിക്കാനും കഴിയുന്നുണ്ട്. ഇനി എനിക്ക് സ്‌കൂളിലും പോവാന്‍ കഴിയും. ഇവിടെ സമാധാനമുണ്ട്. താങ്കളടക്കം എല്ലാവര്‍ക്കും ഏറ്റവും പ്രധാനം സമാധാനം തന്നെയാണല്ലോ.
അതിരിക്കട്ടെ, സിറിയയുടെ വിവിധ ഭാഗങ്ങളില്‍ ആയിരക്കണക്കിന് കുഞ്ഞുങ്ങളാണ് ഇപ്പോഴും ബുദ്ധിമുട്ടുന്നത്. മുതിര്‍ന്ന ആളുകള്‍ കാരണമാണ് അവരിതെല്ലാം അനുഭവിക്കുന്നത്.
താങ്കള്‍ അമേരിക്കയുടെ പ്രസിഡന്റാവുമെന്ന് എനിക്കറിയാം. സിറിയയെ രക്ഷിക്കാന്‍ താങ്കള്‍ക്ക് കഴിയില്ലേ. മരണം നിഴല്‍ വിരിച്ചു നില്‍ക്കുന്ന ഈ മണ്ണിലെ കുഞ്ഞുങ്ങള്‍ക്കായി എന്തെങ്കിലും ചെയ്‌തേ പറ്റൂ..കാരണം അവര്‍ താങ്കളുടെ നാട്ടിലെ കുഞ്ഞുങ്ങളെ പോലെ തന്നെയാണ്. അവര്‍ക്കും സമാധാനം വേണം. എന്തെങ്കിലും ചെയ്യുമെന്ന് താങ്കള്‍ എനിക്കുറപ്പു തരികയാണെങ്കില്‍ ഞാനും ഉറപ്പു തരുന്നു. ഇന്നു മുതല്‍ ഞാന്‍ താങ്കളുടെ പുതിയ സുഹൃത്തായിരിക്കും. താങ്കള്‍ സിറിയയിലെ കുട്ടികള്‍ക്കു വേണ്ടി എന്തു ചെയ്യുമെന്നാണ് ഞാന്‍ നോക്കുന്നത്'.

ബന ഇപ്പോള്‍ താമസിക്കുന്ന തുര്‍ക്കി സിറിയയില്‍ പ്രതിപക്ഷത്തെയാണ് പിന്തുണക്കുന്നത്. എന്നാല്‍ ട്രംപ് സിറിയയുടെ കാര്യത്തില്‍ എന്തു നിലപാടാണ് എടുക്കുകയെന്ന് ഇതുവരെ വ്യക്തമാക്കിയിട്ടില്ല.

സിറിയയിലെ യുദ്ധഭീകരത ട്വീറ്റുകളിലൂടെ ലോകത്തെ അറിയിച്ചുകൊണ്ടാണ് ബന ലോകശ്രദ്ധ നേടിയത്. ഇംഗ്ലീഷ് സംസാരിക്കുന്ന മാതാവ് ഫാതിമയുടെ സഹായത്തോടെയാണ് ബനാ സെപ്റ്റംബറില്‍ ട്വിറ്റര്‍ അക്കൗണ്ട് ആരംഭിച്ചത്. വ്യോമാക്രമണം നിര്‍ത്താന്‍ അന്തര്‍ദേശീയ സമൂഹത്തോട് ഇടപെടണമെന്ന് അഭ്യര്‍ഥിച്ച് ബനായുടെയും അവളുടെ രണ്ട് ഇളയ സഹോദരങ്ങളുടെയും ചിത്രങ്ങള്‍ ഫാത്തിമ പോസ്റ്റ് ചെയ്തിരുന്നു. കല്‍ക്കൂമ്പാരമായ തെരുവുകളുടെ ചിത്രങ്ങള്‍ ബനായുടെ ട്വീറ്റിലൂടെ ലോകത്തിനു മുന്നില്‍ പ്രത്യക്ഷപ്പെട്ടു.

ട്വിറ്ററില്‍ ലോകത്തുടനീളം ആയിരക്കണക്കിന് ഫോളോവേഴ്‌സ് ആണ് ബനാക്കുള്ളത്.