ന്യൂഡല്‍ഹി: കാലിത്തീറ്റ കുംഭകോണ കേസില്‍ സി.ബി.ഐ പ്രത്യേക കോടതി കുറ്റക്കാരനെന്ന് കണ്ടെത്തിയ ലാലു പ്രസാദ് യാദവിന് ശിക്ഷ വിധിക്കുന്നത് ഇന്നത്തേക്ക് മാറ്റി. ഡിസംബര്‍ 13നാണ് റാഞ്ചിയിലെ സി.ബി.ഐ കോടതി ലാലു പ്രസാദ് യാദവിനെതിരായ വിചാരണ പൂര്‍ത്തിയാക്കിയത്. തുടര്‍ന്ന് 23ന് ലാലു കുറ്റക്കാരനാണെന്ന് കോടതി കണ്ടെത്തിയിരുന്നു. ജനുവരി മൂന്നിന് ശിക്ഷാ വിധി പ്രഖ്യാപിക്കുമെന്നായിരുന്നു അന്ന് കോടതി വ്യക്തമാക്കിയിരുന്നത്. എന്നാല്‍, സി.ബി.ഐ കോടതിയിലെ മുതിര്‍ന്ന അഭിഭാഷകന്റെ മരണത്തെ തുടര്‍ന്ന കേസ് ഇന്നലത്തേയ്ക്ക് മാറ്റിവയ്ക്കുകയായിരുന്നു. ഇന്നലെ കേസ് പരിഗണിച്ച കോടതി വിധി പറയാന്‍ ഇന്നത്തേക്ക് മാറ്റി.
ലാലുവിന്റെ പ്രായം കണക്കിലെടുത്ത് കുറഞ്ഞ ശിക്ഷ നല്‍കണമെന്ന് കോടതിയില്‍ ആവശ്യപ്പെടുമെന്ന് ലാലുവിന്റെ അഭിഭാഷകന്‍ മാധ്യമപ്രവര്‍ത്തകരോട് പറഞ്ഞു.
റാഞ്ചിയിലെ ബിര്‍സ മുണ്ട ജയിലിലാണ് ലാലു കഴിയുന്നത്. മുഖ്യമന്ത്രിയായിരുന്ന 1990നും 1994നുമിടയില്‍ സംസ്ഥാന ഖജനാവിന് 84.5 ലക്ഷം രൂപയുടെ നഷ്ടമുണ്ടാക്കിയ കാലിത്തീറ്റ അഴിമതിയില്‍ അദ്ദേഹത്തിന് പങ്കുണ്ടെന്ന് കണ്ടെത്തിയതിനെ തുടര്‍ന്നാണ് നടപടി. അഞ്ചു കേസുകളിലാണ് ലാലു കുറ്റക്കാരനാണെന്ന് കോടതി കണ്ടെത്തിയത്. ഇതില്‍ രണ്ടാമത്തെ കേസിലാണ് ഇന്ന് ശിക്ഷ വിധിക്കുക.