തലശ്ശേരി: സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ പ്രസംഗിക്കുന്നതിന് സമീപം ബോംബേറ്. സംഭവത്തില്‍ ഒരു സി.പി.എം പ്രവര്‍ത്തകന് പരുക്കേറ്റു. തലശ്ശേരി നങ്ങാറത്ത് പീടികയില്‍ കൊലചെയ്യപ്പെട്ട കെ.പി ജിജേഷിന്റെ ചരമ വാര്‍ഷിക ദിനാചരണത്തില്‍ കോടിയേരി പ്രസംഗിക്കുന്നതിന് കുറച്ചകലെയാണ് ബോംബേറുണ്ടായത്.

ജിജേഷ് ചരമ വാര്‍ഷികത്തിന്റെ ഭാഗമായുയര്‍ത്തിയ ബോര്‍ഡില്‍ കരി ഓയില്‍ ഒഴിച്ചെന്നാരോപിച്ച് ഇവിടെ വാക്കേറ്റം നടന്നിരുന്നു. ഇതിനെ തുടര്‍ന്ന് ബൈക്കിലെത്തിയ ബി.ജെ.പി പ്രവര്‍ത്തകര്‍ ബോംബെറിയുകയായിരുന്നെന്ന് സി.പി.എം പരാതിപ്പെട്ടു. ബോംബേറില്‍ പരുക്കേറ്റ നങ്ങാറത്തപീടികയിലെ ശരത്തിനെ (25)തലശ്ശേരി സഹകരണ ആശുപത്രിയില്‍ പ്രവേശിപ്പിച്ചു. സംഭവത്തില്‍ സി.പി.എം തലശ്ശേരി ഏരിയാ കമ്മറ്റി ശക്തമായി പ്രതിഷേധിച്ചു.