കോഴിക്കോട്: വിജ്ഞാനത്തിന്റെ വെളിച്ചവുമായി 1967ല്‍ പ്രവര്‍ത്തനമാരംഭിച്ച ഈസ്റ്റ്ഹില്‍ ഗവ. ഹയര്‍സെക്കന്‍ഡറി സ്‌കൂള്‍ മികച്ച സൗകര്യങ്ങളൊരുക്കി മികവിന്റെ പട്ടികയിലേക്ക്. സുവര്‍ണ ജൂബിലി ആഘോഷിക്കുന്ന വേളയില്‍ അക്ഷരമുറ്റത്ത് സജ്ജമായ പുതിയ ഹയര്‍സെക്കന്‍ഡറി ബ്ലോക്കിന്റെ ഉദ്ഘാടനം ഫെബ്രുവരി മൂന്നിന് രാവിലെ 10ന് വിദ്യാഭ്യാസ മന്ത്രി പ്രൊഫ. സി രവീന്ദ്രനാഥ് നിര്‍വഹിക്കും.
സംസ്ഥാന സര്‍ക്കാര്‍ അനുവദിച്ച 84 ലക്ഷം രൂപയും പ്രദീപ്കുമാര്‍ എം.എല്‍.എയുടെ ആസ്ഥിവികസന ഫണ്ടില്‍ നിന്നും അനുവദിച്ച 50 ലക്ഷം രൂപയും വിനിയോഗിച്ചാണ് പുതിയ കെട്ടിടം യാഥാര്‍ത്ഥ്യമാക്കിയത്.
സുവര്‍ണ ജൂബിലി ആഘോഷങ്ങളുടെ ഉദ്ഘാടനം സംസ്ഥാന പൊതുവിദ്യാഭ്യാസ ഡയറക്ടര്‍ കെ.വി മോഹന്‍കുമാര്‍ ഐ.എ.എസ് നിര്‍വഹിക്കും. ചടങ്ങിനോടനുബന്ധിച്ച് നടക്കുന്ന പൂര്‍വാധ്യാപക,വിദ്യാര്‍ഥി സംഗമങ്ങളുടെ ഉദ്ഘാടനം കോഴിക്കോട് കോര്‍പറേഷന്‍ വിദ്യാഭ്യാസ സ്റ്റാന്റിങ് കമ്മിറ്റി ചെയര്‍മാന്‍ എം. രാധാകൃഷ്ണന്‍ മാസ്റ്ററും ചലച്ചിത്ര സംവിധായകന്‍ വി.എം വിനുവും നിര്‍വഹിക്കും. വാര്‍ത്താസമ്മേളനത്തില്‍ പ്രിന്‍സിപ്പല്‍ പി. മീര, ഹെഡ്മിസ്ട്രസ് ഡി ഗീത, പി.ടി.എ പ്രസിഡന്റ് ദിനേശന്‍ നടുക്കണ്ടി, വിനോദ് ബാബു, സജിത്, വി.എം മോഹനന്‍ സംബന്ധിച്ചു.