നാദാപുരം/വടകര: കഴിഞ്ഞ ദിവസം തലശ്ശേരിയില്‍ സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണനു നേരെയുണ്ടണ്ടായ ബോംബാക്രമണത്തില്‍ പ്രതിഷേധിച്ച് ഇരിങ്ങണ്ണൂരിലും കോട്ടപ്പള്ളിയിലും സി.പി.എം പ്രവര്‍ത്തകര്‍ നടത്തിയ പ്രതിഷേധത്തിനിടെ ബി.ജെ.പി ഓഫിസ് അടിച്ചുതകര്‍ത്തു.
ഇരിങ്ങണ്ണൂര്‍ ടൗണില്‍ പ്രവര്‍ത്തിക്കുന്ന ബി.ജെ.പിയുടെ പഞ്ചായത്ത് കമ്മിറ്റി ഓഫിസാണ് തകര്‍ത്തത്. കെട്ടിടത്തിനകത്തെ ഫര്‍ണിച്ചറുകള്‍ റോഡിലെറിഞ്ഞു കത്തിച്ച നിലയിലാണുള്ളത്. കഴിഞ്ഞ ദിവസം രാത്രി ഒന്‍പതോടെയാണ് സംഭവം. ഇതേത്തുടര്‍ന്ന് ഇന്നലെ ബി.ജെ.പി പ്രവര്‍ത്തകര്‍ എടച്ചേരി പഞ്ചായത്തില്‍ ഹര്‍ത്താല്‍ പ്രഖ്യാപിച്ചെങ്കിലും സി.പി.എം പ്രവര്‍ത്തകര്‍ എതിര്‍പ്പുമായി രംഗത്തെത്തി.
ഇരിങ്ങണ്ണൂര്‍ ടൗണില്‍ പ്രകടനം നടത്താനുള്ള ബി.ജെ.പി ശ്രമത്തിനിടെ ഡി.വൈ.എഫ്.ഐ പ്രവര്‍ത്തകരുമായുണ്ടണ്ടായ സംഘര്‍ഷത്തില്‍ ബി.ജെ.പി പ്രവര്‍ത്തകന് പരുക്കേറ്റു.
പരുക്കേറ്റ എടച്ചേരി പഞ്ചായത്ത് പ്രസിഡന്റണ്ട് രാജന്‍ തലായിയെ നാദാപുരം താലൂക്ക് ആശുപത്രിയില്‍ പ്രവേശിപ്പിച്ചു. സംഘര്‍ഷാവസ്ഥ കണക്കിലെടുത്ത് ഇരിങ്ങണ്ണൂരില്‍ വന്‍പൊലിസ് സന്നാഹം ക്യാംപ് ചെയ്യുന്നുണ്ട്.
കോട്ടപ്പള്ളിയിലും ബി.ജെ.പി ഓഫിസിനു നേരെ വ്യാഴാഴ്ച രാത്രി ആക്രമണമുണ്ടായി. കോട്ടപ്പള്ളിയില്‍ ജയകൃഷ്ണന്‍ സ്മാരക ഓഫിസിന്റെ വാതില്‍ തകര്‍ത്ത് അകത്തു കടന്നവര്‍ ഫര്‍ണിച്ചറും ടി.വി, ഫാന്‍ ഉള്‍പ്പെടെയുള്ള സാമഗ്രികളും തകര്‍ക്കുകയായിരുന്നു. തലശ്ശേരിയിലെ ബോംബേറില്‍ പ്രതിഷേധിച്ച് പ്രകടനം നടത്തിയ സി.പി.എം പ്രവര്‍ത്തകരാണ് ഓഫിസിനു നേരെ അക്രമം അഴിച്ചുവിട്ടതെന്ന് ബി.ജെ.പി പ്രവര്‍ത്തകര്‍ ആരോപിച്ചു.
സംഭവത്തില്‍ പ്രതിഷേധിച്ച് കോട്ടപ്പള്ളി ടൗണില്‍ ബി.ജെ.പി ഇന്നലെ ഉച്ചവരെ ഹര്‍ത്താലാചരിച്ചു. സംസ്ഥാന സെക്രട്ടറി വി.കെ സജീവന്‍, കുറ്റ്യാടി മണ്ഡലം പ്രസിഡന്റ് പി.പി മുരളി, സെക്രട്ടറി എടക്കുടി മനോജ് എന്നിവര്‍ സ്ഥലം സന്ദര്‍ശിച്ചു. സ്ഥലത്തു ശക്തമായ പൊലിസ് കാവല്‍ ഏര്‍പ്പെടുത്തിയിട്ടുണ്ട്.