അരീക്കോട്: ഊര്‍ങ്ങാട്ടീരി പഞ്ചായത്തിലെ കല്ലരട്ടിക്കല്‍ ഗവ. മൃഗാശുപത്രിയുടെ പ്രവര്‍ത്തനം നിലച്ചിട്ട് മൂന്നുമാസമായി. ചൂളാട്ടിപ്പാറ ക്ഷീരോല്‍പാദക സഹകരസംഘത്തിനു കീഴിലുള്ള 500 ഓളം കര്‍ഷകരാണ് മൃഗാശുപത്രിയില്‍ നിന്നാവശ്യമായ സേവനം ലഭിക്കാത്തത് മൂലം പ്രയാസമനുഭവിക്കുന്നത്. ഏറനാട് മണ്ഡലത്തില്‍ തന്നെ ഏറ്റവും കൂടുതല്‍ കര്‍ഷകരുള്ള പഞ്ചായത്താണ് ഊര്‍ങ്ങാട്ടിരി. ആവശ്യമായ ഡോക്ടറില്ലാത്തതാണ് ആശുപത്രി പ്രവര്‍ത്തന രഹിതമാവാന്‍ കാരണമെന്ന് പ്രദേശത്തെ കര്‍ഷകര്‍ പറയുന്നു. നിലവില്‍ ആശുപത്രിയില്‍ മൃഗങ്ങളെ ചികില്‍സിക്കേണ്ട ഡോക്ടര്‍ ഇവിടെ നിന്ന് സ്ഥലം മാറി പോവാനുള്ള ഒരുക്കത്തിലാണ്. ഇദ്ദേഹത്തിന് സ്ഥലം മാറ്റത്തിനുള്ള ഓര്‍ഡര്‍ ലഭിച്ചതായും പകരമായി കല്ലരട്ടിക്കലിലേക്ക് ആരേയും ലഭിച്ചിട്ടില്ലെന്നും ക്ഷീര കര്‍ഷകര്‍ വാര്‍ത്താ സമ്മേളനത്തില്‍ പറഞ്ഞു. അത്യാവശ്യ ഘട്ടങ്ങളില്‍ ഫോണ്‍ വിളിച്ചാല്‍ പോലും ഡോക്ടര്‍മാര്‍ സഹായിക്കുന്നില്ല.
ഭൂമിയും ആഭരണങ്ങളും വിറ്റ് ഉപജീവനത്തിനു വളര്‍ത്തു മൃഗങ്ങളെ വാങ്ങിയവര്‍ക്ക് ഡോക്ടറുടെ അഭാവം മൂലം വലിയ തോതിലുള്ള സാമ്പത്തിക നഷ്ടമാണ് നേരിടേണ്ടി വരുന്നത്. ഊര്‍ങ്ങാട്ടീരി പഞ്ചായത്ത് അധികൃതരും ബന്ധപ്പെട്ട വകുപ്പും ഇവരുടെ പ്രശ്‌നങ്ങള്‍ കേള്‍ക്കാന്‍ തയ്യാറാകുന്നില്ലെന്ന ആക്ഷേപമാണുയരുന്നത്. എത്രയും പെട്ടെന്ന് ആവശ്യമായ ഡോക്ടര്‍മാരെ നിയമിച്ച് ആശുപത്രി തുറന്ന് പ്രവര്‍ത്തിക്കണമെന്നാണ് കര്‍ഷകരുടെ ആവശ്യം. വിഷയത്തില്‍ ഇടപെടണമെന്നാവശ്യപ്പെട്ട് മുഖ്യമന്ത്രിക്കും വകുപ്പ് മന്ത്രിക്കും ക്ഷീരോല്‍പാദക സഹകരണ സംഘം നിവേദനം സമര്‍പ്പിക്കും.