ന്യൂഡല്‍ഹി: അന്താരാഷ്ട്ര വിപണിയില്‍ കോടികള്‍ വിലമതിക്കുന്ന മയക്കുമരുന്നുമായി ഡല്‍ഹിയില്‍ അഞ്ചുപേര്‍ പിടിയിലായി. വിപണിയില്‍ 20 കോടി രൂപ വിലമതിക്കുന്ന 105 കിലോഗ്രാം കറുപ്പാണ് ഡല്‍ഹി പൊലിസ് പിടിച്ചെടുത്തത്. രണ്ടുദിവസമായി നടന്ന അന്വേഷണത്തിനൊടുവിലാണ് അഞ്ചുപേരും പിടിയിലായതെന്നും ഡല്‍ഹി പൊലിസിന്റെ ചരിത്രത്തിലെ ഏറ്റവും വലിയ കറുപ്പ് വേട്ടയാണ് ഇതെന്നും സ്‌പെഷല്‍ സെല്‍ ഡി.സി.പി എസ്.കെ യാദവ് പറഞ്ഞു.
നന്ദ്രാം അലിയാസ് മാസ്റ്റര്‍ (55), മംഗ്‌ളി റാം (32), ഉമേഷ് സൈനി (50), രാകേഷ് ഗുപ്ത (50), ചന്ദര്‍പാല്‍ (50) എന്നിവരാണ് പിടിയിലായത്. മണിപ്പൂരില്‍ നിന്നു മയക്കുമരുന്നു കടത്താന്‍ ശ്രമിക്കവേയാണ് സംഘത്തിലെ രണ്ടുപേര്‍ ആദ്യം പിടിയിലായത്. ഇവരില്‍ നിന്നു ലഭിച്ച സൂചന അനുസരിച്ച് മറ്റു മൂന്നു പേരെയും അറസ്റ്റ് ചെയ്യുകയായിരുന്നു എന്നു പൊലിസ് വ്യക്തമാക്കി.