കൊണ്ടോട്ടി: സ്ഥലപരിമിതിയില്‍ വീര്‍പ്പ് മുട്ടുന്ന കൊണ്ടോട്ടി നഗരസഭാ ഓഫിസ് നവീകരിക്കുന്നു. 60 ലക്ഷം രൂപ ചെലവിലാണ് ഓഫിസ് നവീകരിക്കാന്‍ നഗരസഭ കൗണ്‍സില്‍ യോഗം തീരുമാനിച്ചത്. ഇതോടൊപ്പം ദേശീയപാതയില്‍ നിന്ന് നഗരസഭയിലേക്കുള്ള റോഡ് ടാറിങ് ചെയ്യുന്നതിന് 5.75 ലക്ഷം രൂപയും അനുവദിച്ചിട്ടുണ്ട്.
ഓഫിസ് നവീകരണത്തിന് അനുവദിച്ച ഫണ്ടില്‍ 20 ലക്ഷം ലോകബാങ്ക് ഫണ്ടാണ്. ചെയര്‍മാന്‍, വൈസ് ചെയര്‍പേഴ്‌സണ്‍, സ്ഥിരംസമിതി അധ്യക്ഷന്‍മാര്‍, കൗണ്‍സിലര്‍മാര്‍ എന്നിവര്‍ക്കുളള മുറികള്‍, മിനികോണ്‍ഫറന്‍സ് ഹാള്‍ എന്നിവയാണ് നവീകരണത്തിന്റെ ഭാഗമായി പുതുതായി വരുന്നത്.
നിലവിലുളള കെട്ടിടത്തിന്റെ പിറകിലേക്കും ഇടതുഭാഗത്തുമായാണ് പുതിയ മുറികള്‍ നിര്‍മിക്കുക. വലതുഭാഗത്ത് പുതിയ കെട്ടിടം നിര്‍മിക്കുന്നതിനാണ് 20 ലക്ഷം രൂപ അനുവദിച്ചത്. പദ്ധതിക്ക് ആസൂത്രണസമിതി അംഗീകാരം ലഭിച്ചു. ടെണ്ടര്‍ നടപടികള്‍ പൂര്‍ത്തിയാകുന്നതോടെ നിര്‍മാണം ആരംഭിക്കും. കൊണ്ടോട്ടി പാണ്ടിക്കാട്ടുളള പഞ്ചായത്ത് ഓഫിസ് തന്നെയാണ് നഗരസഭയ ആയപ്പോഴും നഗരസഭ കാര്യാലയമായി പ്രവര്‍ത്തിക്കുന്നത്. കൊണ്ടോട്ടിയോട് നെടിയിരുപ്പ് പഞ്ചായത്ത് കൂടി ചേര്‍ത്താണ് നഗസരസഭ രൂപീകരിച്ചത്.
ഇതോടെ കൗണ്‍സിലര്‍മാരുടെ എണ്ണം 40 ആയി ഉയര്‍ന്നു. എന്നാല്‍ പഴയ പഞ്ചായത്ത് ഓഫിസ് കെട്ടിടത്തില്‍ തന്നെയാണ് കൗണ്‍സില്‍ യോഗവും ഓഫിസും പ്രവര്‍ത്തിക്കുന്നത്. ഇതിനെ തുടര്‍ന്നാണ് നിലവിലെ കെട്ടിടം നവീകരിക്കാന്‍ തീരുമാനിച്ചത്.