പള്ളിക്കല്‍: ഇരുട്ടാകുന്നതോടെ ബസുകള്‍ ട്രിപ്പ് മുടക്കുന്നത് യാത്രക്കാരെ ദുരിതത്തിലാക്കുന്നു. കൊണ്ടോട്ടിയില്‍ നിന്നും പള്ളിക്കല്‍ ബസാര്‍ വഴി യൂനിവേഴ്‌സിറ്റി റൂട്ടിലോടുന്ന ചില ബസുകള്‍ക്കെതിരേയാണ് നാട്ടുകാരുടെ പരാതി.
രാത്രിയാവുന്നതോടെ ബസുകള്‍ ട്രിപ്പ് മുടക്കുന്നത് മൂലം വിവിധ വ്യാപാര സ്ഥാപനങ്ങളില്‍ ജോലി ചെയ്യുന്നവരുള്‍പ്പെടെ നിരവധി യാത്രക്കാരാണ് ഏറെ പ്രയാസപ്പെടുന്നത്. പള്ളിക്കല്‍ ബസാര്‍ റൂട്ടില്‍ കൊട്ടപ്പുറം മുതല്‍ ദേവതിയാല്‍ വരെയുള്ള എട്ട് കിലോ മീറ്റര്‍ ദുരത്തിനിടയില്‍ വിവിധയിടങ്ങലിലെത്തേണ്ട യാത്രക്കാര്‍ ഓട്ടോറിക്ഷയുള്‍പ്പെടെയുള്ള മറ്റു വാഹനങ്ങള്‍ വിളിച്ചും കൊണ്ടോട്ടിയില്‍ നിന്നും യൂണിവേഴ്‌സിറ്റി കോഹിനൂര്‍ ഭഗങ്ങളിലേക്കുള്ള യാത്രക്കാര്‍ രാമനാട്ടുകര വഴി ബസ് മാറിക്കയറി ഇരട്ടിയിലേറെ കിലോ മീറ്റര്‍ യാത്ര ചെയ്യേണ്ട അവസ്ഥയുമാണ്.
സ്ത്രീകളും വൃദ്ധരുമുള്‍പ്പെടെയുള്ളവരാണ് ഏറെ പ്രയാസപ്പെടുന്നത്. പതിനഞ്ചോളം മിനി ബസുകള്‍ ഈ റൂട്ടില്‍ സര്‍വിസ് നടത്തുന്നുണ്ട്. രാത്രി 8 എട്ട് മണി വരെ പെര്‍മിറ്റ് അനുവദിച്ചിട്ടുണ്ടെങ്കിലും 7 ഏഴ് കഴിഞ്ഞല്‍ കൊണ്ടോട്ടിയില്‍ നിന്നും പള്ളിക്കല്‍ ബസാര്‍ ഭാഗത്തേക്ക് ബസ് ട്രിപ്പെടുക്കുന്നില്ലെന്നാണ് നാട്ടുകാര്‍ പറയുന്നത്.
നാട്ടുകാരുടെ യാത്രാ പ്രശ്‌നം പരിഹരിക്കുന്നതിനായി ഈ റൂട്ടില്‍ മിനി കെ.എസ്.ആര്‍.ടി.സി ബസ് അനുവദിക്കണമെന്നും നിലവിലുള്ള ബസുകള്‍ രാത്രി സമയങ്ങളിലെ ട്രിപ്പെടുക്കുന്നതിനാവശ്യമായ നടപടികള്‍ ബന്ധപ്പെട്ടവര്‍ കൊകൊള്ളണമെന്നുമാണ് നാട്ടുകാരുടെ ആവശ്യം.