കണ്ണൂര്‍: സമ്പൂര്‍ണ വൈദ്യുതീകൃത ജില്ലയായി പ്രഖ്യാപിക്കുന്നതിനായി തദ്ദേശ സ്വയംഭരണ സ്ഥാപനങ്ങള്‍ അടിയന്തിരമായി വിഹിതം കൈമാറണമെന്ന് ജില്ലാ ആസൂത്രണ സമിതി യോഗം നിര്‍ദേശിച്ചു. പദ്ധതി നടത്തിപ്പിനായി 50 ശതമാനം കെ.എസ്.ഇ.ബിയും 25 ശതമാനം സ്ഥലം എം.എല്‍.എയും ബാക്കി 25 ശതമാനം തദ്ദേശ സ്ഥാപനങ്ങളുമാണു വഹിക്കേണ്ടത്. നിലവില്‍ എം.എല്‍.എമാരും കെ.എസ്.ഇ.ബിയും തുക വകയിരുത്തിയിട്ടും തദ്ദേശ സ്വയംഭരണ സ്ഥാപനങ്ങള്‍ക്ക് ഇക്കാര്യത്തില്‍ അവ്യക്തത തുടരുകയാണ്. പദ്ധതി നടത്തിപ്പിനുള്ള ചുമതല പൂര്‍ണമായും കെ.എസ്.ഇ.ബിക്ക് മാത്രമാണെന്നും വിഹിതം സമയബന്ധിതമായി കൈമാറേണ്ട ചുമതല മാത്രമാണു തദ്ദേശസ്ഥാപനങ്ങള്‍ക്ക് ഉള്ളതെന്നും യോഗം അറിയിച്ചു. ബന്ധപ്പെട്ട പഞ്ചായത്ത് അധികൃതരുമായി സംസാരിച്ച് പദ്ധതി നടത്തിപ്പ് വേഗത്തിലാക്കാന്‍ കെ.എസ്.ഇ.ബിക്കു കലക്ടര്‍ നിര്‍ദേശം നല്‍കി.
ജില്ലയില്‍ വരള്‍ച്ച രൂക്ഷമാകുന്ന സാഹചര്യത്തില്‍ ജലസംരക്ഷണ പ്രചാരണ പ്രവര്‍ത്തനങ്ങള്‍ ഊര്‍ജിതമാക്കാനും യോഗം തീരുമാനിച്ചു. ഇതിനായി ഓരോ പഞ്ചായത്തില്‍ നിന്നും സാമൂഹ്യപ്രവര്‍ത്തനങ്ങളില്‍ തത്പരരായ 5 പേരെ വീതം തെരഞ്ഞെടുക്കും. ഇവര്‍ക്ക് ജില്ലാ പ്ലാനിങ് ഓഫിസിന്റെ നേതൃത്വത്തില്‍ പരിശീലനം നല്‍കും. പരിശീലനം ലഭിച്ച അംഗങ്ങള്‍ ഓരോ അയല്‍കൂട്ടങ്ങളും സന്ദര്‍ശിച്ച് ജലസംരക്ഷണത്തിനുള്ള ഫലപ്രദമായ മാര്‍ഗങ്ങള്‍ പ്രചരിപ്പിക്കും.
പതിമൂന്നാം പഞ്ചവത്സര പദ്ധതിക്കായി ആസൂത്രണ സമിതി രൂപീകരിക്കല്‍, വര്‍ക്കിങ് ഗ്രൂപ്പ് തയാറാക്കല്‍ എന്നിവയും യോഗം ചര്‍ച്ച ചെയ്തു. ഗ്രാമപഞ്ചായത്തുകളിലെ ആസൂത്രണ സമിതി അംഗങ്ങള്‍ക്കുള്ള പരിശീലനം ആറു മുതല്‍ നടക്കും.
ജില്ലാ പഞ്ചായത്ത് പ്രസിഡന്റ് കെ.വി സുമേഷ്, കലക്ടര്‍ മിര്‍ മുഹമ്മദലി, പ്ലാനിങ് ഓഫിസര്‍ കെ പ്രകാശന്‍, മേയര്‍ ഇ.പി ലത സംബന്ധിച്ചു.