HOME
DETAILS

ജില്ലയുടെ തനത് കാര്‍ഷിക സംസ്‌കാരം വീണ്ടെടുക്കാന്‍ വിത്തുത്സവം

  
backup
May 27 2016 | 22:05 PM

%e0%b4%9c%e0%b4%bf%e0%b4%b2%e0%b5%8d%e0%b4%b2%e0%b4%af%e0%b5%81%e0%b4%9f%e0%b5%86-%e0%b4%a4%e0%b4%a8%e0%b4%a4%e0%b5%8d-%e0%b4%95%e0%b4%be%e0%b4%b0%e0%b5%8d%e2%80%8d%e0%b4%b7%e0%b4%bf%e0%b4%95

കാട്ടിക്കുളം: ജില്ലയില്‍ അന്യം നിന്നുപോയ കാര്‍ഷിക സംസ്‌കാരം വീണ്ടെടുക്കുന്നതിന് പ്രകൃതി സൗഹൃദ കാര്‍ഷിക ആവാസവ്യവസ്ഥയുടെയും നാടന്‍ വിത്തിനങ്ങളുടെയും പ്രചരണം ലക്ഷ്യമിട്ട് തിരുനെല്ലി ഗ്രാമപഞ്ചായത്ത് നടത്തുന്ന വിത്തുത്സവത്തിന് കാട്ടിക്കുളത്ത് തുടക്കമായി.
 പരിപാടി നിയുക്ത എം.എല്‍.എ ഒ.ആര്‍ കേളു ഉദ്ഘാടനം ചെയ്തു. ഒരു നാടിന്റെ സംസ്‌ക്കാരം, ജീവിതശൈലി എന്നിവയുടെ അടിസ്ഥാനം കാര്‍ഷികമേഖലയാണെന്നും ജില്ലയിലെ തനത് കൃഷിരീതിയിലേക്ക് കര്‍ഷകരെ തിരിച്ചുകൊണ്ടുവരുന്നതിനും സംരക്ഷിക്കുന്നതിനും നടപടികള്‍ ഘട്ടംഘട്ടമായി നടപ്പാക്കുമെന്നും അദ്ദേഹം വ്യക്തമാക്കി.
 ഗ്രാമപഞ്ചായത്തു വഴി നടപ്പാക്കുന്ന പദ്ധതികളില്‍ കര്‍ഷകര്‍ക്ക് പ്രാധാന്യം നല്‍കും. നെല്‍കൃഷി വ്യാപകമാക്കുന്നതിലൂടെ വരള്‍ച്ചാ പ്രശ്‌നങ്ങള്‍ പരിഹരിക്കാനും ഭക്ഷ്യ ഉല്‍പാദനം വര്‍ധിപ്പിച്ച് ക്ഷീര മേഖലയെ മെച്ചപ്പെടുത്തി അതുവഴി തൊഴിലവസരങ്ങള്‍ സൃഷ്ടിച്ച് അതിലൂടെ സ്ഥിരവരുമാനം കണ്ടെത്താനും സാധിക്കുമെന്ന് അദ്ദേഹം കൂട്ടിച്ചേര്‍ത്തു. സേവ് അവര്‍ റൈസ് ക്യാംപയിന്റെ ഭാഗമായി തയാറാക്കിയ 'വിത്തും കൈക്കോട്ടും' പത്രിക പ്രകാശനം ജില്ലാ പഞ്ചായത്ത് അംഗം എ.എന്‍ പ്രഭാകരനു നല്‍കി ഒ.ആര്‍ കേളു നിര്‍വഹിച്ചു.
 ജൈവകൃഷിയിലൂടെ കര്‍ഷക രക്ഷ എന്ന വിഷയത്തില്‍ തണല്‍ ട്രസ്റ്റി സി ജയകുമാര്‍ മുഖ്യപ്രഭാഷണം നടത്തി. ഭക്ഷ്യവിളകള്‍ക്ക് വേണ്ടി അന്യസംസ്ഥാനങ്ങളെ അമിതമായി ആശ്രയിക്കുന്ന ഇന്നത്തെ സാഹചര്യത്തില്‍ പരമ്പരാഗതവും ജൈവകൃഷിരീതികളും അവലംബിച്ച് കാര്‍ഷിക സംസ്‌കാരം തിരിച്ചുപിടിക്കാന്‍ സാധിക്കുമെന്ന് പൊതുജനങ്ങളെ ബോധവല്‍ക്കരിക്കുന്നതിനായാണ് വിത്തുത്സവം സംഘടിപ്പിച്ചിരിക്കുന്നത്. ഒറ്റല്‍ മുണ്ടേന്‍, മുള്ളന്‍ ചെന്താടി, ഗന്ധകശാല, നസര്‍ബത്ത്, മണ്ണു വെളിയന്‍, ബദുമ, വടക്കന്‍ ചിറ്റേനി, തൗവ്വല്‍, ഓക്ക കണ്ണി ചെന്നെല്ല്, കലജീര, ബ്ലാക്ക്-വൈറ്റ് ജാസ്മിന്‍, ചേറ്റു ചോമാല തുടങ്ങി ഇരുനൂറോളം നാടന്‍ നെല്‍വിത്തിനങ്ങള്‍ പ്രദര്‍ശനത്തിനൊരുക്കിയിട്ടുണ്ട്.
 പനവല്ലി ആഗ്രോ ഇക്കോളജി സെന്ററിന്റെ തണല്‍, പരമ്പരാഗത ഇന്ത്യന്‍ പരുത്തി തുണിത്തരങ്ങളുടെ സ്റ്റാള്‍ , കാര്‍ഷിക അറിവുകള്‍ ഉള്‍ക്കൊള്ളുന്ന പുസ്തക സ്റ്റാള്‍, പാരമ്പര്യ ഭക്ഷണശാല തുടങ്ങി 27ഓളം സ്റ്റാളുകളാണ് ഇവിടെ ഒരുക്കിയിട്ടുള്ളത്. നെല്‍വിത്തിനങ്ങള്‍ കൂടാതെ അറുപതോളം കിഴങ്ങുവര്‍ഗങ്ങള്‍, ചോളം തുടങ്ങി ചെറുധാന്യങ്ങള്‍, പഴവര്‍ഗങ്ങള്‍, പച്ചക്കറി വിത്തുകള്‍ എന്നിവയുടെ പ്രദര്‍ശനവും ഒരുക്കിയിട്ടുണ്ട്. പ്രദര്‍ശനത്തോടൊപ്പം വിത്തു കൈമാറ്റത്തിനും വിപണനത്തിനും അവസരമൊരുക്കിയിട്ടുണ്ട്.
തണല്‍, കുടുംബശ്രീ, ഭാരത് ഭീജ് സ്വരാജ് മഞ്ച്, പെസ്റ്റിസൈഡ് ആക്ഷന്‍ നെറ്റ്‌വര്‍ക്ക്, ആത്മ വയനാട്, തിരുനെല്ലി സര്‍വീസ് സഹകരണ ബാങ്ക്, കേരള ഗ്രാമീണ ബാങ്ക്, ജി.വി.എച്ച്.എസ്.എസ് മാനന്തവാടി എന്‍.എസ്.എസ് യൂനിറ്റ്, പി.കെ കാളന്‍ സ്മാരക സാംസ്‌കാരിക വേദി, ഗ്രീന്‍ ലവേഴ്‌സ് മാനന്തവാടി, നിലം സ്വയംസഹായ സംഘം എന്നിവരുടെ സഹകരണത്തോടെയാണ് വിത്തുത്സവം സംഘടിപ്പിച്ചിരിക്കുന്നത്. തിരുനെല്ലി ഗ്രാമപഞ്ചായത്ത് പ്രസിഡന്റ് മായാദേവി അധ്യക്ഷയായ പരിപാടിയില്‍ തിരുനെല്ലി ഗ്രാമപഞ്ചായത്ത് വികസനകാര്യ സ്റ്റാന്റിങ് കമ്മിറ്റി ചെയര്‍പേഴ്‌സണ്‍ സാലി വര്‍ഗ്ഗീസ്, ഗ്രാമപഞ്ചായത്ത് അംഗം കെ സാജിത്ത്, റ്റി ഉണ്ണികൃഷ്ണന്‍, സംഘാടക സമിതി കണ്‍വീനര്‍ കെ ലെനീഷ്, വടക്കേ വയനാട് വനം ഡിവിഷന്‍ ഡി.എഫ്.ഒ നരേന്ദ്രനാഥ് വേളൂരി സംസാരിച്ചു.



Comments (0)

Disclaimer: "The website reserves the right to moderate, edit, or remove any comments that violate the guidelines or terms of service."