കാക്കനാട്: അമിത കൂലി ചോദിച്ചത് ചോദ്യം ചെയ്ത യാത്രക്കാരന് നേരെ നഗ്‌നത പ്രദര്‍ശിപ്പിച്ച ഓട്ടോറിക്ഷ ഡ്രൈവര്‍ക്ക് വാഹനവകുപ്പ് 2500 രൂപ പിഴ ചുമത്തി. ഇടപ്പള്ളി ഭാഗത്ത് നിന്ന് ഓട്ടം വിളിച്ച കോതമംഗലം സ്വദേശി ജോര്‍ജ് എന്നയാള്‍ക്കാണ് ദുരനുഭവം ഉണ്ടായത്.
ഇടപ്പള്ളി സിഗ്‌നല്‍ ജങ്ഷനില്‍ നിന്ന് ഒബ്‌റോന്‍ മാള്‍ വരെ കഷ്ടി ഒരു കിലോ മീറ്റര്‍ ദൂരത്തിന് 30 രൂപയാണ് ഓട്ടോ ഡ്രൈവര്‍ ആവശ്യപ്പെട്ടത്.
ഇത് ചോദ്യം ചെയ്ത് ഓട്ടോറിക്ഷയുടെ നമ്പര്‍ കുറിച്ചെടുക്കുന്നതിനിടെ ക്ഷുഭിതനായി ഡ്രൈവര്‍ തുണിപൊക്കികാണിച്ചെന്നാണ് പരാതി.
കാക്കനാട് ഡെപ്യൂട്ടി ട്രാന്‍സ്‌പോര്‍ട്ട് കമ്മിഷണറുടെ സ്‌ക്വാഡ് പരാതിയില്‍ അന്വേഷണം നടത്തി ഡ്രൈവറെ കസ്റ്റഡിയിലെടുക്കുകയായിരുന്നു. മോട്ടോര്‍ വെഹിക്കള്‍ ഇന്‍സ്‌പെക്ടര്‍ സുരേഷിന്റെ നേതൃത്വത്തിലാണ് അന്വേഷണം നടത്തിയത്.
ഓട്ടോറിക്ഷ ഡ്രൈവര്‍മാര്‍ അമിത കൂലി ഈടാക്കുന്നതായി പരാതി വ്യാപകമായ സാഹചര്യത്തില്‍ പരിശോധന നടത്താന്‍ മോട്ടോര്‍ വാഹന വകുപ്പ് അധികൃതര്‍ തീരുമാനിച്ചിട്ടുണ്ട്. യാത്രക്കാരോട് മോശമായി പെരുമാറുന്നവര്‍ക്കെതിരെ കര്‍ശന നടപടി സ്വീകരിക്കും.